樓市出更：中價舖炒慶閒閒哋賺一成

近排舖位炒賣熱烘烘，但係寫字樓同埋工廈市道就麻麻地，短線賺幅有限，有啲已經忍唔住手，見勢轉軚分散資金去炒舖，所以樓價半億元以下嘅中價舖位短炒獲利增多，而每宗賺幅一般都超過一成，賺幅之高，係近期工、商物業罕見。劉Sir收到風，有個工商物業投資者啱啱摸出中環九如坊雙號地下部分，成交價差唔多3,090萬元，大約三個星期帳面速賺448萬元。

美聯商業營業董事郭漢釗（Kenny）話，舊年到依家，整體寫字樓做價升幅一成都冇，投資者好難短炒獲利，反而，期內舖位做價升勢凌厲，聽番啲舖壇老手講，過去一年舖位做價升幅有一倍，相比之下，難怪部分寫字樓及工廈投資者都趁銀行放水，開始分散資金炒舖。

半億樓下 回報三厘

Kenny話，由於同一條街嘅舖位價值可以相差好遠，所以店舖新進投資者都抱「摸石頭過河」心態，唔會一開始就一擲億元買舖，好多都係揀啲半億元或以下舖位，原因買賣流通快，加上收租回報率一般都有三厘，就算摸唔到，都可以收租頂住。佢透露，有個揸住金鐘力寶中心多個單位嘅投資者，早前已密密出貨，同時轉吸中環及跑馬地多個舖位。

港島中區一線街舖涉資動輒億元，部分寫字樓等投資者小試牛刀，吸納區內二線舖位，消息稱，上述九如坊嘅原業主，見個舖面積大約800方呎，當時開價2,700萬元唔使，好快就拍板購入，依家近3,090萬元摸出，帳面賺幅近17%。

佐敦舖貴15%摸出

有個寫字樓投資者有感寫字樓樓價中期升幅唔大，早前買咗佐敦寧波街單號地下部分，面積約1,900方呎，啱啱成功以近4,000萬元摸出，不足兩周帳面賺約530萬元，獲利幅度逾15%。

另有一個有投資商用物業，惟較少染指商舖嘅投資者，早排亦都摸出咗旺角上海街單號地下舖位，面積約1,600方呎，成交價逾3,130萬元，唔使兩個星期帳面賺約450萬元，賺幅亦近17%。