牛熊對壘：中行轉強順勢買18484

希臘民調顯示，支持緊縮方案嘅新民主黨支持率領先，加上內地刺激經濟措施陸續出台，尋日幾乎個個板塊都炒上。港股尋日嘅反彈，可算係踏入五月份跌市以來最似樣嘅一次。恒指升254點，以大陽燭突破短期降軌，成交達490億元，較前日增加約100億元。

喺恒指收復萬九點下，尋日共有9隻恒指熊證及3隻恒指牛證被劏。而截至五月廿八日，牛證嘅重貨區上移到18,400點至18,600點，而熊證則主要集結在19,200至19,400點，後者涉及3.8億份街貨。今日就係期指結算日，而熊證重貨區距離尋日收市19,055點只有約200點，大戶好可能趁勢挾埋上去，揸住熊仔真係要自求多福。

尋日輪證嘅成交金額都有所回升，但牛熊證佔大市成交比例則由14.1%回落至11.8%，認股證佔大市成交亦由15.9%回落至13.6%，可能係因為大市反彈，炒正股嘅人多咗。不過，近期西班牙銀行業嘅問題開始惡化，而距離希臘大選仲有逾半個月先舉行，後市去向始終未明，所以現時無論買股定買輪都要留一手。

ASM沽空急增

沽空方面，尋日提過嘅中海外（00688）繼續成為空軍目標，沽空金額高達2.22億元，佔成交嘅百分比高達三成五。另外，半導體股ASM太平洋（00522）雖然沽空金額不多，只有逾2,000萬元，但沽空比率高達76%，有啲唔尋常，投資者要小心為上。

日前有內銀高層表示，四大行今年可能因經濟增長放緩而無法實現貸款目標，而內地五月嘅新增信貸規模亦很可能低於四月。有關內地銀行嘅負面消息不絕於耳，不過唔好唔記得我哋仲有阿爺，除咗可能放多次水，仲可能會減息，而閃批基建項目亦有助提升融資嘅需求。

中行（03988）股價近日在2.8元水平觸底後，成功收復10日線，昨日上試保力加通道中軸，MACD亦牛叉初現，技術走勢明顯改善，看好此股，可小注博中行大和購（18484），行使價2.98元，溢價7.5%，實際槓桿6.7倍，為人氣之選。