Fundman睇市：康師傅「獨弱」有原因

市場視左搖右擺的希臘退出歐元區民調，作為入市指標，抗緊縮的左翼聯盟支持度稍低於五成，加上市場憧憬內地可能推出更多刺激經濟政策，支持港股重返萬九點樓上，昨升254點，報19,055點，即月期指收18,963點，升276點。好友成個五月份身中多刀之後，總算在結算前夕贏番幾塊膠布。

唔少股民把基金經理奉若神明，查實多年來經驗話畀我哋知，超過半數基金長期都跑輸大市。供咗十年份強積金，幾多有好下場，大家心裏有數。至於近年如雨後春筍的對沖基金，說穿了，大部分根本不以對沖套戥搵食，而只係以槓桿放大賭本的超級賭徒。

記得唔少芬佬年初錢多貨少，見長期再融資操作（LTRO）有效，一、二月瘋狂摸頂掃貨，到三、四月無以為繼，當五月第二波歐豬風暴來犯，已恨錯難返，五月未完唔少早已輸凸。近兩日，見high beta中資股被掃到甩轆，到底係沽空比率創十三年新高之後的補倉？抑或大孖沙睇住自己本簿唔掂檔，盡地一煲博一博？睇嚟兩個因素同時存在。

鋼鐵股有尋寶機會

憧憬中央有限度放寬調控樓市政策，加上內地公布五十四個城市的五月累積售樓量，創一一年初調控以來新高，內房股走勢凌厲，昨日介紹的恒大（03333）升9.2%，短短幾日由低位反彈超過兩成。如果錯過機會，在其他醜女股中尋寶，不妨留意歷史市帳率仲處於偏低水平的鋼鐵股，例如馬鋼（00323）。

最睇唔通的可能是建材股，今年首五個月內地水泥價格一直級級落，像中國建材（03323），大行睇死產量及折舊上升，加上東部城市水泥價格仲未見底，未來兩季業績難會好看。然而，近期股價跌至8.4元行人止步，並無跟大市下試年初低位7.45元，唯一解釋是預期市盈率6.2倍，短期不利因素已反映。另外，睇番三月份累計沽空唔少（介乎9.5至10.8元），一旦空軍集體回補空倉，估計股價仲有1至2元水位可以炒吓。

年初筆者睇好內需食品股，理由是原材料價格回落，經歷近兩年的毛利率壓縮期可望告一段落，即使銷售放緩，食品股業績仍然唔難有可觀增長。不過十隻手指有長短，年初至今，統一（00220）升44.5%，旺旺（00151）升18%，唯獨康師傅（00322）卻跌23.7%，表現有雲泥之別。

康師傅「獨弱」的成因，撇除一次性收益，首季核心溢利按年跌16%，飲品業務無像預期般復甦外，原材料價格雖然回落，但方便麵毛利率卻受低價產品比重上升影響而被拖低，二十九倍預期市盈率仲要比統一的二十五倍為高，市佔率有流失趨勢，相比之下，統一短期的值博率明顯較高。