股海實戰：馬鋼短線動力增強

港股尋日上晝仲係唔上唔落，但隨着家電同汽車股持續上揚，利好氣氛更擴散至其他中資股，國企指數率先重上10日線，其後恒指跟隨升幅擴大，大市成交回升至490億元，似乎淡友選擇平倉。

尋日升市中資股升勢全面，究竟平倉盤帶動嘅反彈市有多大動力同多持久，阿莊唔係大好友，都係見步行步。初步睇國指反彈阻力喺10,000點關，而恒指阻力則喺19,650點。跟炒唔係罪，最緊要靈活變通，有咩唔對路識得抽身離場。

熔盛重工可關注

阿莊尋日話高風險高回報可選恒大（03333），結果以全日高位4.29元收市，升9%。若想從超低殘股入手一博，可關注熔盛重工（01101），五月份股價表現跑贏大市，尋日收報2.1元，升2.9%，10日線已重上50日線，只要中資股氣氛持續改善，此股反彈阻力喺2.5元，回吐宜守1.93元。

與當年拋四萬億人仔刺激經濟嘅出發點相同，中央穩增長選擇從家電同汽車業入手，一方面呢兩個行業聘用不少勞工，對相關產品消費進行補貼有助穩定就業，促進消費；另一方面，呢兩個行業使用不少原材料進行生產，例如鋼材、玻璃、電子零件等，促進消費有助加快去除原材料庫存，提速產業改革進度。見股價低迷已久嘅資源股股價亦蠢蠢欲動，可見橋唔怕舊，最緊要受！

講到資源股，兩隻鋼材股鞍鋼（00347）及馬鋼（00323）分別升7%及8%。目前內地鋼鐵業仍面對嚴重嘅產能過剩問題，產業調整需時。今年首季，馬鋼首季業績見紅，更已就上半年業績發盈警，引發投行大幅削減其盈利預測及目標價，股價由今年一月高位3.09元跌至本月低位僅1.68元。

為應對行業低潮，近年馬鋼積極推進轉型升級，提高產品技術含量，增加產品種類，方向正確。隨着中央開始發功穩增長，下半年基建、家電及汽車業嘅需求可獲得改善，股價先行反映利好因素，將成為短線股價反彈嘅原動力。雖然，現時評論行業見底實乃言之尚早，惟見馬鋼市帳率僅0.46倍計，估值已一定程度反映行業情況。走勢上，中期仍處下降軌，惟短線14日RSI及MACD均有改善，回吐企穩20日線1.91元樓上反彈可持續，下兩個阻力位分別喺2.15元及2.5元，跌穿1.81元止蝕。