樓市出更：恒地最想個個月可強拍

政府近年加大推地力度，但當中市區靚地唔多，而本港老牌發展商之一嘅恒地（00012），呢幾年就好少透過投地增加土儲，反而係密密購併舊樓，佢地尋日就啱啱透過強拍，以底價8.3億元統一咗大角咀海安樓全幢，諗住斥13億元重建一幢商住大廈。恒地執董黃浩明同劉Sir講，集團希望未來每個月都可以有購併項目達到強拍門檻，呢句話反映到恒地今年起將進入舊樓購併收成期。

有發展商高層同劉Sir呻，市區住宅地買少見少，所以好多財團早幾年開始，已積極收購舊樓，其中以恒地最勇，聽講該集團好多市區舊樓都收得七七八八，夠資格申請強拍。今年初恒地有管理層喺研討會放風，今年該集團諗住擲25億至30億元收購舊樓，足見佢地嘅決心。

農地補價貴 四叔話煩

事實上，近期恒地多位高層，已就增持土儲策略露玄機，恒地主席李兆基（四叔），之前講過農地補地價太貴，已厭倦與政府傾補地價。另外，恒地近幾年買地策略係市區細地唔諗，該集團副主席林高演日前表示，沙田九肚及將軍澳地規模太細，反而會留彈藥研究投大圍站及荃灣西站上蓋之類大型項目。

擬重建29層 明年底賣

恒地執董黃浩明同劉Sir講，依家唔少舊樓業主都好精叻，發展商要成功收購，唔係想像中咁易，不過，好彩恒地主席李兆基先知先覺，兩、三年前已叫公司同事做多啲舊樓收購，收購價無依家咁貴，所以要達強拍最低要求就相對無咁困難。

被問及依家恒地揸住幾多舊樓，同埋目標今年可以強拍幾多幢，佢就笑笑口話查吓先，不過，可以透露嘅係集團希望每個月能公布到有舊樓達強拍標準。黃浩明話，依家強拍措施已經運作好好，若果喺法院審理批核上再快啲就更好。

佢仲話，尋日以強拍底價奪得嘅海安樓，位於大角咀利得街11至33號及11A至33A號，黃氏稱，將重建一幢29層高商住大廈，提供200伙，平均建築面積約735方呎，地庫有停車位，另有6個地舖，總樓面大約16.5萬方呎，最快今年下旬拆樓，可望最快出年年底以樓花形式賣。