股海實戰：中建材國策股佳選

新iBond下周二起接受認購，入場費一萬蚊。見到連某位向來熱衷炒作嘅財經演員都話個市太波動，不如買iBond等收息，相信確有唔少缸邊友心死下離場，備留本錢認購iBond。難怪尋日港股成交縮減至僅367億元，扣埋牛熊證及窩輪成交合共110億元，縱使恒指略有反彈，亦要大打折扣。

上周五加注新華保險（01336）6,000股，尋日見隻股質唔落，拿拿臨買埋嗰4,000股，結果收報29.25元，升3.9%。下周一該股正式加入成為國企指數成分股，且看本周五收市前指數基金買貨，可唔可以推番隻股上30元樓上。

車股升獨缺比亞迪

尋日有消息指內地為谷經濟，會加大對汽車行業嘅補貼，包括研推汽車下鄉，東風（00489）、長汽（02333）、吉利（00175）尋日升幅介乎8至10%。唯獨比亞迪股份（01211）逆市跌5%，皆因旗下一輛E6電動的士在事故中着火，市場關注電動汽車電池安全問題。不過，喺節能減排嘅大前提下，長遠鼓勵使用電動汽車係事在必行，唔會因為一兩宗事故而打沉，比亞迪方面宜盡快調查並交代事故報告，以平息風波。

A股市場尋日先跌後回升，事緣有分析指，最近鐵道部再次獲2萬億元人仔授信，發改委上周初喺一天之內審批近百個項目，並批准寶鋼、武鋼兩個共值1,300億元人仔嘅投資項目。顯然，雖然今次中央冇話拋「四萬億」刺激經濟，暫時看來規模亦未及「四萬億」之多，但近期嘅一舉一動與當年推「四萬億」措施猶如翻版，分別只係規模細啲，且預留空間讓民間資金參與，所以有評論指今次中央落藥係「四萬億」嘅改良版﹗

「四萬億2.0版」下有咩股可以受惠，穩陣嘅當然係鐵路同基建股，高風險高回報嘅係上周阿莊提及嘅內房股，如人氣較旺嘅恒大（03333）。中性啲可揀建材股，龍頭股之一嘅中國建材（03323）可視為佳選，今年二月以來股價兩次落到8.7元水平就跌唔落，近日一直守穩10日線，技術走勢有改善，若人氣配合下突破50日線9.74元，下一阻力位睇五月初高位10.5元水平，8.7元支持未宜有失。但請恕阿莊長氣，如今魚缸人氣低迷，市況容易大幅波動，入市要量力而為，嚴守紀律。