樓市出更：浪翠蟹貨仍低九七價四成

前排有樓價指數顯示本港整體樓價已超越九七，不過該指數屬平均數字，多個港島區屋苑呎價雖升穿九七，但仲有九龍區屋苑同多個新界區屋苑仲未返家鄉，其中以新界西深井浪翠園最嚴重，今個月呎價錄約4,708元，比九七高位低39.4%。而藍田滙景花園有高層單位以432萬元售出，九七年持貨至今蝕51萬元。

樓價破頂，作為「升市火車頭」嘅港島區屋苑率先上岸，但劉Sir睇番中原提供嘅數據，其實九龍區同新界區都仲有唔少屋苑有排都追唔番九七高位，隨手都搵到多達15個屋苑未返家鄉，樓價同九七差幅，可以超過一成到近四成。

好似上述浪翠園五月份呎價暫報約4,708元，較九七年七月錄得嘅呎價7,774元相差超過3,000元，差幅達約39.4%；屯門邁亞美海灣本月呎價亦與九七年有約32.4%差幅，最新報約3,810元。

麗港城距高位差14.6%

至於新界東都唔係好好多，好似馬鞍山雅典居同火炭駿景園，本月呎價錄約6,005元及7,512元，較九七年低約25.8%及25%。唔好以為市區盤就唔怕坐艇，藍田麗港城同滙景花園呎價相對當年高位都有約14.6%及13.7%差幅，最新呎價約6,282元及6,741元。

咁多屋苑做價同九七有咁大差距，唔怪得劉Sir耐唔耐都仲聽到九七蝕讓成交啦，市場就啱啱錄到滙景花園同雅典居九七損手個案。

雅典居損手45萬離場

利嘉閣湯炳強話，上述滙景花園7座高層B室以432萬元售出，呎價6,353元，原業主九七年三月持貨至今，損手約51萬元或10.6%。世紀21奇豐梁榮貴都話，雅典居4座高層A室剛售600萬元，九七年連車位購入價約680萬元，扣除市值約35萬元車位，原業主都要損手約45萬元。

但講到「蝕入肉」嘅個案，根據中原數據顯示，原來浪翠園1期2座低層E室喺三月以310萬元登記售出，比起九七年六月登記買入價，帳面蝕咗173萬元，蝕幅高達約35.8%。