股海實戰：上海醫藥觀察承接力

內地經濟增長放緩，出口定單旺季不旺、銀行新增貸款不理想、股市一蹶不振、企業融資困難……再係咁差落去，可大可小！聽聞近期領導人及各主要部門官員不停赴前線調研，上周五更有官媒報道，不排除短期人行會以減息來振興經濟。阿莊相信，博阿爺出招穩增長有值博率，魚缸敢死隊當選高啤打值股，如內房股，低殘嘅資源股亦係高風險高回報之選。

新華保險加注買貨

阿莊上周二買入首注新華保險（01336），話會再加注，上周五見27元守得住，故以平均價27.4元買入6,000股，會再睇位買齊兩萬股。

今年金價由高位每安士約1,790美金回落至本月低位1,526美金，累跌約15%，若然睇今次跌浪只係一個調整，照計落到1,500美金邊應該差唔多。金礦股中，招金礦業（01818）今年以來股價由高位累跌五成，已頗大程度反映金價下跌嘅影響，不妨（目及）實，低位中線收集。

呢期上海市旗下上市公司被是非纏擾，先係多家公司宣布高層人士變動，繼而係負面傳聞滿天飛，近日受累嘅係上海醫藥（02607），雖然呢次管理層解畫反應好似慢咗啲，但對負面傳聞一一否認，總算穩住人心，加上原來上周四控股股東入市增持公司457萬股，通告更講明控股股東計劃喺未來十二個月內繼續增持，相信有助穩定局面。事實上，傳聞中涉及的兩個收購項目，對上藥影響有限，即使係出問題，甚而要報消交易，亦不足以令股價如此狂瀉。

究竟今次上藥風波係咪同江湖傳聞所指嘅「內鬥」有關，不得而知。但阿莊相信，有阿爺做主，內部矛盾好快會平息，加上控股股東亦已表明再增持，而以上周五上藥收市價9.26元計，往績市盈率降至唔夠九倍，加上平日交投唔係太多，唔係有大是大非，幾難想像可以喺呢個價上車。只係考慮到嚟緊三個星期環球魚缸將再起風雲，入市策略宜盡量保守，本周可先觀察9元承接，守穩其上始作考慮。