樓市出更：西區細盤車位癲過樓

農曆年後，各屋苑頻頻破頂，但劉Sir覺得車位仲癲過住宅，個別地區住宅車位做價都升破百萬元，好似樓齡約廿五年嘅堅尼地城怡景花園，現時最高車位價已達108萬元，而同區比較多人識嘅高樂花園，都已經係百萬車位屋苑，相比呢類物業，住宅單位做價約莫三、四百萬元，車位做價分分鐘係住宅價值嘅四分之一。

港島西區由於係舊區，所以車位比例一向都唔夠，車位升值能力仲高過住宅單位，部分車位價錢等於樓上住宅嘅兩、三成，好似知名度限於本區嘅皇后大道西怡景花園，有個單號車位就以108萬元賣出，嗰幢物業今年暫時只得一個1座高層C室住宅買賣登記，成交價係390萬元，相比起一個車位都動輒百萬元，車位價值所佔比例，計落仲貴過啲豪宅車位。

高樂車位售近114萬

同區嘅高樂花園情況亦差唔多，該屋苑今年暫時有約十幾宗住宅買賣登記，除咗一個3座高層G室成交價去到438萬元之外，其餘普遍係300幾萬元，而呢個屋苑近幾個月已經錄得約3宗百萬車位成交，每宗成交價介乎100萬至近114萬元。

惠安苑車位速賺13%

至於大型屋苑都錄得零星短炒車位個案，好似鰂魚涌惠安苑有車位今年二月以50萬元登記購入，到三月時以56.5萬元登記賣出，速升約13%。

反而舊年炒到烚烚、出現一年炒五轉嘅九龍站擎天半島車位，今年就靜番晒，今年到依家暫錄約25宗車位成交之中，只得約5宗係持貨一年內轉售嘅個案，持貨最短係一個5樓雙號車位，今年一月以94萬元登記賣出，約三個月賺11萬元，升幅約13%。

今年已經有幾個豪宅屋苑出現破200萬元車位，好似淺水灣聚豪居及西區寶翠園，分別有車位以247萬與276萬元賣出，而淺水灣道56號更創出車位價300萬元，冠絕全港紀錄。

今年首季純車位登記量按季急升近九成，去到2,245宗，升幅跑贏住宅同工商物業，三個價格界別之中，全部登記量都有700幾宗，不過就以30萬元以下嘅細價車位登記量按季升幅最標青，升幅高約230%。