買樓不如低撈地產股

四叔看淡未來兩三年本港樓市將跑輸地產股，因大氣候有歐債危機，而本港下半年有達1萬個私樓單位推出市場，明年又會復建居屋， 所以不如買地產股等升值。

四叔雖然未肯預測年底時樓價會升抑或會跌，但坦言「住宅樓我會賣晒先」，「依家有成萬個單位等緊入伙紙，政府又要推居屋、公屋，加上投地，供應大咗，貨多個市就唔好」。他說：「你買普通樓，只會起少少，幾年唔會大起，依家買樓不如買股票。」

謙稱睇唔通股市

四叔指自己「睇唔通」目前市況，指歐洲非常反覆，希臘七個一皮（意即極度混亂），又有對沖基金漁利，令市場「心驚膽細跌過龍」。現在本港地產股整體有達六成折讓，他建議「不如買股票，一兩年後一千萬可以升一倍到二千萬。」

事實上，曾俊華昨日於網誌亦指，本港樓市風險與日俱增，政府會時刻保持警惕，並密切留意市況，如有需要會毫不猶豫再出招，以確保樓市健康平穩發展。

被問到應該買邊隻？四叔稱「我做恒地、新地（00016）董事，唔講得，否則犯法。」但他以恒地為例，「恒地我估值100蚊，依家就唔夠40蚊，好抵買，等兩、三年後復甦，折讓收窄，等於可以升一個開。」至於恒發（00097），四叔指該公司無大作用，當是殼股，拒絕透露如何注資，只稱「到時睇有咩用。」