市場徐想：德昌盈利表現改善
提起藍籌工業股，大家或者不期然會諗起以前嘅德昌電機（00179）！睇番近期業績，德昌截至今年三月底止年度營業額為21.41億美元，按年增長2%，股東應佔溢利則按年增長2.7%至1.87億美元，比公司自己估計仲高出1%，由此推斷佢業務改善番，預計一三至一四年盈利應該會更上一層樓。
德昌業務包括生產、銷售馬達、機電零件、動力系統及物料，管理層一直努力優化業務同調整架構，去提升營運效率，令各業務都可以保持健康嘅營業溢利率。集團亦喺近幾年加強咗新產品嘅開發，亦推出創新驅動應用嘅產品，長遠來說，對集團嘅持續增長以及價值創造有利條件。
集團純利能夠比估計好，主要係因為汽車產品客戶需求強勁，最大嘅汽車產品營業額達12.73億美元，其中美洲市場表現最標青。而公司出口業務遍布全球，分散咗地區風險，前景相對穩定。睇番數據，德昌嘅息率約2.1厘。繼續追蹤、出發！