牛熊對壘:海螺走勢轉強吼14659

前晚嘅歐盟非正式會議,一如市場所料,並無任何突破性進展,相信都係要等六月正式峰會舉行先有希望。另一方面,滙豐中國五月製造業PMI初值回落至48.7,連續七個月處於50以下的收縮水平,而德法嘅PMI更跌至○九年以來最低水平,尋日恒指跌119點算係客氣。

雖然國內外數據都咁弱,但恒指都冇跌穿本月十八日18,622點的低位,睇嚟呢個支持比想中有力,而尋日被收回嘅牛證數目由前日嘅19隻大幅減少至7隻,當中只有4隻係恒指牛證,而目前牛證嘅街貨密集區同前日大致一樣,仍然集結於18,400至18,600點之間,不過涉及嘅街貨量就減少咗約三分一至4.5億份,睇嚟唔少牛證捧場客都被劏到怕。

尋日港股成交仍然維持偏低水平,只有480億元,但窩輪成交卻錄得80.6億元,佔大市成交嘅比重由前日嘅13.9%升至16.8%,牛熊證佔大市成交比重則上升約一個百分點至14.3%,達68億元。而經過前日恒指裂口低開後,熊證錄得3,249萬元的資金流入,似乎部分散戶開始改變對後市嘅睇法。

沽空比率見回落

創過十三年新高嘅沽空比率後,尋日淡友終於收斂番啲,沽空佔大市成交比率回落至單位數,錄得9.7%。滙控(00005)終於退位,由騰訊(00700)坐上沽空榜首之位,雖然股價昨日回穩,卻未有減低空軍襲擊嘅意欲,沽空金額達3.04億元,佔成交金額比重逾三成,不過比起前日滙控五成嘅比率,空軍對騰訊已經很友善。

水泥股近日走勢呈強,主要是由於總理溫家寶一再重申穩增長,加大預調微調力度,並推進「十二五」規劃重大項目按期實施,有望加速拉動基建項目。內地水泥股龍頭安徽海螺(00914),股價自日前在低位開出破腳穿頭的利好訊號後,開始穩步回升。該股輪證好倉在截至五月廿三日的五個交易日共錄得161萬元的資金流入,若看好此股,可吼海螺渣打購(14659),行使價22.88元,溢價8.1%,實際槓桿七倍,可博轉價內。

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!

藺俠