股海實戰：恒大地產可炒波幅

歐盟非正式會議冇料到，加埋內地經濟數據差劣，港股尋日低開，午後試圖反撲不果，結果還要插119點收市，報18,666點，成交降至481億元。如今魚缸中最多人問嘅問題係：大市見底未？阿莊傾向尚未見底，皆因六月中旬希臘大選前淡友不乏做淡藉口，好友仍處下風，另美匯指數尋日進一步抽高至82.54，尚未有掉頭迹象。再講，近期大市沽空比率上升至高位，經驗話畀大家知，咁嘅情況顯示港股尚在尋底當中。

保增長壓力加大

尋日公布嘅滙豐中國製造業PMI指數初值又再次回落至50樓下，為48.7，A股亦難再維持強勢，滬綜指跌12點，收報2,350點；深成指更再次失守1萬點關，收報9,984點，跌158點。顯然，單單「降準」一招所起嘅刺激作用已不大。

中國社科院近日發表房地產藍皮書，指今年行業會不斷優化及提升調控政策，並繼續鞏固已有嘅調控成果，加大對首套住房嘅金融支持力度，但亦指出喺宏觀經濟增速放緩，保增長壓力增大下，宏觀調控可能逐步由緊縮轉向寬鬆。

阿莊唔覺得嚟緊中央會為咗保增長而放鬆樓市調控，但一點可以肯定嘅係，政策力度大致已到了頂峰，今年主調係「鞏固」成果，隨着保障房逐步落成並推出市場，就讓樓市自行調節。嚟緊要睇房企各自嘅銷售實力，只有放大周轉量，做到「貨如輪轉」，不斷回籠資金，才能避過捲入債務危機嘅漩渦。

有追開阿莊呢個欄，都知長揸內房阿莊屬意揀有阿爺支持嘅中國海外（00688）同潤地（01109），至少唔使擔心財困而關門大吉。但如今行業政策風險已到頂，民企大可發揮靈活變動嘅優勢搶灘。

恒大地產（03333）喺三線城市項目自住比例逾八成、首置比例逾六成，符合政策方向，今年首四個月累計完成銷售164億元人仔，佔全年銷售目標約兩成。短線股價守穩3.5元樓上，料維持喺3.5至4.5元嘅波幅區上落。次季公司有大量新盤推出，股價能否突破，就要視乎季內銷售表現。