樓市出更：九龍居屋王一個月兩破頂

居屋樓價升幅相當得人驚，好似已經係九龍居屋王嘅旺角富榮花園，最近有個高層單位以呎價高達7,782元賣出，呎價約一個月兩度破頂再升近7.7%，稱霸九龍居屋市場；同屋苑車位做價亦都唔輸蝕，係約四個月內三度破頂，最近有車位賣成77萬元，貴絕全港居屋車位市場。

以呎價創九龍居屋新高紀錄賣出嘅富榮花園3座高層K室，面積505方呎，成交價393萬元，呎價7,782元。該屋苑一向係九龍居屋一哥，上個月至有一個5座同面積單位賣咗365萬元，呎價7,228元，但紀錄話咁快就被打破。

有區內地產代理同劉Sir講，其實富榮花園樓價咁高，除咗因為冇盤，政府估價進取亦係推高樓價嘅原因之一，好似屋苑有個1座同面積單位，之前綠表價賣260萬元，但估價話如要補埋地價賣要再加160萬元，加埋成420萬元，咁樣業主叫價點會唔「巔」。

錦鞍呎售4485又新高

而富榮花園車位做價更加係貴絕全港居屋，自從今年二月有車位以72萬元全港居屋新高價賣出之後，車位價格竟然喺約四個月內三度破頂，最近一個M層雙號車位以77萬元成交，將紀錄進一步推高。

除咗市區居屋之外，新界居屋都冇執輸，世紀21奇豐徐永成話，馬鞍山錦鞍苑A座有個低層面積709方呎單位，賣咗318萬元，呎價4,485元，做價及呎價創屋苑同類單位新高。

好似同區嘉華星濤灣2座高層E室，中原柳發利講，面積1,087方呎，畀個區內換樓客用718萬元買咗，呎價6,605元，創屋苑最高呎價。

金獅SSD盤賺59萬離場

港島區樓價就更加高到「離譜」。世紀21北山話，炮台山光超台B座高層5室，面積668方呎，成交價達518萬元，呎價7,754元，創屋苑新高；另北角慧雲峯高層E室，連車位賣咗成1,600萬元，就算扣番個市值70萬車位，呎價都要12,469元，亦創屋苑分層單位新高。

世紀21奇豐講，大圍金獅花園2期C座中層3室，原業主前年十二月用150萬元買入，近排以220萬元轉賣畀收租客，減番5%SSD都賺成59萬元。