股海實戰：天能動力只啱炒家

港股周初反彈過後又再掉頭，尋日恒指跌252點，期指更大低水200點，真係山雨欲來風滿樓咁款！雖然如今唔少好友正等候恒指做出小雙底反彈並重上10日線，但睇見美匯指數未有掉頭迹象，尋日更曾衝穿82，若然恒指再落，下個位睇今年一月低位18,302點。

繼寶姿（00589）前日復牌股價急挫後，尋日又有另一隻基金愛股被狂質，今次主角係上海醫藥（02607），繼三月突然應控股股東要求更換董事長後，尋日因傳出早前公司收購嘅項目存帳目問題而被調查，消息令上藥A股跌停板，H股就曾跌36%，低見7.7元，市值最多唔見33億元，全日成交股數增至5,540萬股，收報9.11元，跌24%。論股價及成交異動，都足以叫公司「停賽」或者至少喺下午開後前發通告交代情況，點知結果兩樣都冇，難免令人聯想到交易所大細超，對待大型中企特別鬆手﹗

繼續迴避內銀股

A股尋日走勢回軟，事關權重嘅內銀板塊未有起色。消息指內地五月份首廿日四大行新增貸款僅340億元人仔，雖然已較上周盛傳五月份首兩周零增長有改善，但顯然改善速度緩慢，成個五月都唔慌會有奇迹出現，所以一於繼續暫避內銀股。

電池股板塊有異動，天能（00819）同超威（00951）分別升2.2%及4.7%。去年四月內地有關部門針對鉛酸電池環保問題，關了一大批細廠，鉛酸電池產品價格確曾有一輪上漲，但今年三月以來回復跌勢，事緣唔少不合格嘅細廠又再死灰復燃，加上大廠不停增產，結果市場供大於求。聽聞最近天能同超威更打起價格戰，相信會對兩者嘅銷售額同毛利率產生負面影響，唯一正面因素係五月以來鉛價回落，有助減輕原料成本嘅壓力。

阿莊認為，鉛酸電池行業改革未收到理想效果，而鋰電池作為替代品亦正在加快發展，加埋近日發生減價戰事件，論板塊前景不講得係坦途，所以想沾手嘅話，只能睇實成交即市小注怡情。見天能成交較為活躍，應較合炒家胃口，尋日收報4.08元，下一較大阻力喺4.5元，250日線支持喺3.9元。

前日提過中興（00763）未到撈底時，反彈一日後，尋日真係穿底。此外，前日買入嘅新華保險（01336），尋日落過26.95元，但低位成交好少，收報27.2元，再落啲會適量加注。