魚缸Blogger：龍工搭轉順風車
淡友冚倉盤同憧憬阿爺出手撐經濟下，尋日魚缸曾有過一段逾200點嘅攻勢，但外圍同內地前景仲未明朗，資金都唔敢坐貨過夜，結果全日僅升116點，睇嚟市底仍然好弱。
溫爺爺之前提振基建嘅言論繼續被無限放大，暴炒男早兩日推介嘅股仔亦初嘗甜頭，今日就一於打鐵趁熱，冷吼啱啱開車嘅中國龍工（03339）。雖然龍工舊年純利按年微跌2%，但市傳內地將加快審批基建項目，尋日更有指住建部官員首肯揚州獎勵個人購房嘅政策，令市場解讀為樓控微調力度或增強，再加埋放水嘅預期，落後多時嘅龍工尋日終於爆上，兼扭轉埋短期下跌趨勢，不妨搭轉順風車，阻力先睇2.7元。
中國龍工（03339）
阻力位：2.7元
支持位：2.0元