牛熊對壘：中海油博反彈吼18389

大市過去十三個交易日跌足十一日，超賣嚴重，係時候作個技術反彈，恒指昨高開139點後，升幅一度擴大至260點，尾段因期指急回而升幅大為收窄至0.6%，國指全日升1.2%，是恒指的一倍。港股升得少，成交亦少，主板只有525億元，反映股民沒大批加入追貨行列，入市意欲一樣咁低，至怕是死貓彈完又再散過，惟有繼續採用極短線的走位策略，就算要持貨過夜，注碼都唔好咁大。

歐盟領導人今日舉行非正式會議，相信市場氣氛會變得觀望，為反彈市加添變數。昨日沽空金額為50.83億元，佔比9.6%，不排除個別早前被空軍狂轟的股份有較多平倉盤，short squeeze壓力可推高股價，但同時間要留意大戶會否趁勢沽貨套現。市況複雜，開短倉怕挾，做Long又有機會被人當提款機，難度相當高。

只要睇睇環球時間表，如希臘六月的國會選舉等重要事件，就知風雨未過，大市還有一個又一個難關。不過，一輪衝鋒後都要抖吓氣，來自各路的大鱷亦要重整一下策略，就算是被散戶視為財雄勢大的衍生工具發行商，在非常波動的市況中，好容易因對沖來不及應對而招致損失，結果同散戶齊齊做輸家。

街貨未見樂觀情緒

前日認購證及牛證好倉錄得5,408萬元資金流入，牛熊證總街貨相對期指張數卻非常接近，都是3,000幾張。大市跌到咁超賣，雖有資金流入博後市上升，但街貨分布未見樂觀情緒，難道好友今次真係輸到怕？昨日即市觀察見資金流出個別股份認購證，整體窩輪及牛熊證成交均下跌，分別跌至67.32億元及65.65億元，較周一減少了8.6%及12.2%。

油價由近七個月低位反彈，相關油股應聲而起，中海油（00883）由五月初的16.96元調整至14元邊，已經跌唔落，現價較50日線低約一成，可以小注相關認講證，睇15.5元短線阻力，可留意海油渣打購（18389），行使價14.9元，到期日今年九月二十四日，實際槓桿8.4倍，引伸波幅37.8%。