股海實戰：上海電氣現承接力

港股呢個月唔見超過兩千點，但尋日反彈最多只係得260點，埋單僅升116點，真係深深體會到咩叫做「聊勝於無」﹗

寶姿（00589）復牌，並披露原來公司成了大股東嘅私人周轉提款機，結果公司主席請辭，相信未來公司需要提高董事會嘅獨立及專業性，以挽回投資者嘅信心。寶姿三月廿八日停牌，當時恒指處20,800點水平，短短個多月港股唔見一成有多，寶姿復牌股價要反映番停牌期間大市跌幅，加上本身又受負面消息所困，經濟不景其核心業務經營亦面臨挑戰，尋日股價急挫38%係合情合理。至於短線可唔可以博反彈？市場上有咁多又平又好嘅股份可供選擇，又何必偏要玩火中取栗？

金飾股宜逢高減磅

呢期港股走勢疲弱，但仍見企業購併重組消息出現，且IPO活動亦照常進行。聽聞隻Graff Diamonds前日路演，定價市盈率最高達二十四倍，估值唔便宜，故帶起一眾現成影子股反彈。阿莊認為，呢啲市抽新股，好嘅唔會益散戶，唔好嘅就齋懂潛水，真係唔做唔錯！至於揸住現成金飾珠寶股嘅，最好把握每次反彈浪減磅走人，事關歐債可能要再拖一、兩年、美股喺總統大選後走勢未明、中國經濟增長明顯放慢，奢侈品需求下降係大趨勢，唔排除往後板塊估值須作更深度調整。

阿莊上周話當新華保險（01336）回落到28至30元可以考慮分注買入，尋日遂以每股28.25元買入一萬股，且看染藍前會否有指數基金吸納。此外，近月大宗商品價格明顯下挫，最近鋼價便創今年新低，重型機械製造商應可受惠。

今年首季，上海電氣（02727）新定單欠佳，股價由四月高位4.3元，跌至本周初低位3.21元，尋日反彈3.7%，報3.34元，現價一二年預測PE落到九倍，除非管理層大幅調低今年嘅銷售目標，否則現價估值開始展現承接力。見鄧普頓於本月上旬入市增持該股1,190萬股，持股量增至10.09%。嚟緊股價去向視乎內地會否一如預期喺下月重新審批核電項目，3元邊乃短期重要支持，250日線阻力處3.72元。