樓市出更：北上代理苦撐嗌救命

內地樓市喺調控下，交投一直萎縮，地產代理仍無啖好食，各家本港代理行相繼大刀闊斧削減內地規模，美聯（01200）直言，目前係內地代理最困難嘅時刻，公司去年至今已縮減內地約20至30%人手及分行；中原喺內地只剩番約2.6萬至2.7萬名員工，比去年下半年高峰勁裁成萬人，旗下深圳信譽家停止營業。

美聯執行董事兼內地業務總舵手張錦成同劉sir訴苦，話受宏調措施衝擊，內地樓市交投係咁萎縮，地產代理焗住要艱苦經營，家陣可謂最艱難時期，業界為咗生存，無可避免縮減規模甚至撤出部分城市。

美聯滬分行全摺埋

當中，東北地區情況最為嚴峻，現時上海及北京整體代理公司及從業員數量，估計比起高峰期已經大幅削減超過一半。

張董透露，美聯去年起已經將內地業務規模縮減約20至30%，全國削減超過50間分行同約500人，上海全數分行經已關閉，目前集團內地分行數量仲有約200間，人手唔夠3,000人。

除咗僧多粥少之外，內地代理行嘅經營成本亦係咁上升，張董又話，現時上海同北京等大城市，個別靚舖月租高達10幾萬元人民幣，同香港一線代理「靚舖」睇齊，而工資升幅亦好驚人，北京及上海等大城市代理底薪普遍已經要成1,500至2,000元人民幣，相對以往平均僅約1,000元人民幣明顯急升。

代理行累裁達萬人

至於舊年亦已大幅削減內地規模嘅中原，其中國大陸區總裁賴國強話，內地樓市成交偏少，市場難免出現淘汰情況，旗下深圳信譽家去年底已停止營業，中原內地經歷去年十月後大幅裁員及削減分行後，目前全國分行只約1,200間，人手約2.6萬至2.7萬人，相信規模已合適，近月仲開始轉虧為盈，暫唔打算再收縮規模。中原主席黎明楷年初時話，中原內地人手已由去年高峰約3.6萬人大減數千人，即年初至今中原內地已再度裁減5,000人，累積裁員多達1萬人。

同系利嘉閣旗下利尊喺上海開咗兩年半左右，分行數量有減無加，首年最高峰期開咗成10間分行，最後3間分行喺今年四月更加全部摺埋，幾乎撤出上海二手樓市。