魚缸Blogger：中交建撈底博放水
魚缸上周唔見成千點後，理論上應好快有一次技術反彈，但希臘局勢立立亂，加上今晚秋官又有新劇上，「丁蟹效應」始終要忌佢三分，今日都係即市炒吓上落就算。
雖然內地上月經濟數據差勁，歐債危機又隱隱發作，但眼前困境就令暴炒男諗起阿爺喺○九年嘅四萬億人仔雷霆救市，所以唔排除早前嘅節能補貼只係大規模放水嘅前奏，今日就不妨睇吓隻放水受惠概念股中交建（01800）。有消息指「十二五」嘅鐵路發展規劃將提早達標，而阿爺要提振經濟，最立竿見影嘅方法就係刺激基建，加上近排嗰市幾乎日日跌，放水憧憬就更大，反彈阻力不妨先睇7蚊。
中交建（01800）
阻力位：7.0元
支持位：6.3元