股海實戰：一拖具博反彈條件

五月首十三個交易日，全球股市市值唔見超過30萬億港元，真係大災難！阿莊見缸邊友喺恒指落到兩萬點時，已經話啲股票好平要撈底、落到19,400點又話見底入市，結果呢？上周五恒指落過18,622點，仲係一開市就低開逾400點，根本無機會畀你走，雖然收市跌幅收窄至249點，報18,951點，但未能倒升，足顯市底極度疲弱，故別對短期反彈力度抱太大期望。

本周美國及歐元區均有重要經濟數據公布，中、港魚缸繼續被外圍因素主導。眨眼一年過咗將近五個月，內地經濟增長明顯放緩，雖然中央一直強調會「預調微調」，但單係降準都要等到千呼萬喚始出來，大家也別再期望「萬億托市」嘅奇景會再重現，如今投資股票只能將目光放中、長線，短線唔係冇得炒，但主要策略只能係等極度超賣下小注博實力股反彈，咁做法入市次數亦自然唔會好多，故奉勸各位職業炒家，一係繼續食老本，一係就及早搵份兼職幫補吓，或當搵啲嘢寄託，唔好留喺魚缸磨爛蓆！

今年一個肯定繼續獲得中央積極支持嘅板塊，應該係農業。今年全國農機補貼金額料增一成多，至200億元人仔。講到農機補貼，自然想起第一拖拉機（00038）。去年公司業績受購併整合及特殊項目影響而倒退，由於今年補貼金額有增無減，估計公司單係來自農機業務嘅營業收入可突破百億元大關，整體業績存改善空間。受國家農機補貼資金撥付滯後影響，去年其應收帳款增五成，惟料收回風險不高。

憧憬回歸A股市場

上周一拖母公司與美國通用簽訂協議合作研發電動拖拉機，相信未來公司產品亦會朝節能、減排等方向發展。今年公司計劃嘅資本性開支約7.4億元，手頭有現金及等值有13億元，若今年順利回A股市場掛牌可再籌集新資金，應可滿足發展所需。

股價方面，唔經唔覺已由二月高位9.39元回落至上周五低位6.32元，累跌幅度逾三成，已反映去年業績因素，且跌浪中成交縮減，反映實際沽壓非想像般大。阿莊無意在此估底，只係認為其估值已回落至相對合理嘅水平，且政策利好因素未變，相信待大市氣氛好轉，股價嘅反彈力度亦會較大。