樓市出更：壽臣山地皮今周接力搶

壽臣山深水灣徑豪宅地將會喺今個禮拜五截標，呢類可以提供大單位兼具規模嘅港島地，真係賣一幅少一幅，劉Sir相信幅地一定爭崩頭，市場估計每方呎樓面地價高近1.8萬至近3萬元，估值大約44.6億至74.4億元，接獲標書可達6份以上。但政府近年係咁用限量條款去增加中小型單位供應，咁大單位供應咪愈來愈少？有測量師認為兩類單位差價有機會擴大，形成兩極化局面。

港島區住宅供應差唔多乾塘，所以市場睇好呢幅深水灣徑8至12號青巒現址地皮，財團勾出價35.89億元，每呎勾地價約14,464元，已創歷來次高，僅次於山頂加列山道12號嘅每呎1.8萬元。

高緯環球大中華區估值諮詢部董事張翹楚預計，入標反應會好熱烈，而標書嘅數目可能有6至8份以上，預計售價約62億元，即係樓面地價約2.5萬元。

供應背馳 樓價兩極化

張翹楚話，政府近年為咗滿足單位供應目標而加設限量條款，咁反而令大單位供應變得緊絀。

佢舉例，依家實用面積1,076方呎以上大單位，只係佔總存量約7.5%，就算計埋753至1,076方呎中大型單位佔供應量約12%，即係中大型單位加埋都唔夠總存量兩成，咁嘅情況可能會令中小型單位同豪宅價格出現兩極化，而豪宅價格會有較大上調空間。

劉Sir近日親身到地皮視察，青巒依家由3幢約15層高嘅住宅組成，張氏續稱，其實項目發展分層式住宅，規模同依家差別唔會好大，預計提供約110伙，落成後開售呎價料約4萬元，佢覺得有財團未必會將項目「推倒重來」重建，或會保留部分現有樓面，以節省重建成本。

張翹楚認為，發展商不妨考慮預留一幢出租，睇番附近嘉明苑及文禮苑等豪宅，呎租大約50幾蚊，照計投得嘅財團每呎叫租可以去到50幾至60蚊，即係月租約10幾萬元。

坪洲東灣地 周五截標

市場估計，項目可以吸引多家大型發展商入標，相信包括長實(00001)、新地(00016)、南豐及信置(00083)等。

另一幅由財團勾出嘅坪洲東灣A地盤亦同日截標，勾地價約550萬元，市場上限估值約920萬元。