股海實戰：新華保險可中線收集

尋日恒指高開逾百點後，最高只係見過19,452點，本月以來恒指累跌超過兩千點，相比之下反彈力度明顯不足，故見尾市升勢無以為繼，結果恒指收市跌58點，報19,200點，成交604億元。見核心嘅內銀、內險、內房，電信，以至本地地主及銀行股都未有大起色，兩隻巨無霸滙控（00005）同中移（00941）反彈乏力。呢啲位入場買實力股唔係毫無贏面，只係要做定心理準備可能要持貨一段時間。

燈飾股無謂揸過夜

尋日內地市場表現比港股佳，事緣人行行長話會與證監會合作以支持資本市場改革發展，而另一個支持A股嘅原因，乃有指月初以來，發改委等多個部門正密集調研，並醞釀新一輪擴大內需系列政策。但睇番四月份商務部亦聯同多個部委推「消費促進月」，結果係雷聲大雨點小。畢竟資金面未有根本改善，難以全面提振魚缸表現。

講開又講，尋日家電、節能燈飾及環保汽車股逆市做好，皆因國家將安排363億元人仔財政補貼，以促進節能家電產品、環保燈飾、節能汽車及高效電機產品消費，見雷士照明（02222）及真明麗（01868）分別升9%及11%，創維（00751）及海爾電器（01169）分別升11%及5%，長城汽車（02333）升5%，獨比亞迪股份（01211）先升後跌0.75%。環顧相關股份交投，大部分似未足以推動股價來個絕地反擊，尤其係燈飾股，小注即市跟炒無妨，但過夜就可免則免。

前日大熱倒灶未能入選MSCI系列指數嘅新華保險（01336），股價急跌過後，尋日反彈1.8%。公司今年首四個月及四月份的保費收入增幅雖分別較首季及三月份有所下降，但表現乃繼首季後再一次領先行業平均水平。多間投行亦預計，今年新華保險嘅業務增長可跑贏同業。近日股價跌勢，純因短線投機盤所致，基本因素未見明顯轉壞。阿莊仲好記得呢隻股上市之初，獲實力表叔極力推介，故一直有留意其走勢，呢轉股價回落至28至30元，會認真考慮分注作中線收集，向下重要支持喺25元水平，主要阻力介乎35至37元區域。