樓市出更：投資者搶貨無契盤照擸

樓價高企，市場缺盤，有較大折讓嘅無契樓及銀主盤，或者免繳額外印花稅嘅工商類物業，都成為唔少投資者嘅搶購目標；觀塘居屋曉麗苑低層無契單位，尋日減價翻叮再拍，並以一口價261萬元成交，呎價約3,137元，低市價約兩成，消息話，新買家係上個月初買咗藍田康栢苑無契盤嘅鬍鬚余。

上述曉麗苑F座極低層11室承法院令，尋日透過忠誠拍賣行推出翻拍，單位面積約832方呎，拍賣行註明唔提供樓契，開價261萬元，比上月初推出拍賣時開價290萬元低咗一成，故吸引多個資深投資者到場，包括一向有投資凶宅等另類物業嘅伍冠流等。

鬍鬚余兩掃無契盤

呢個單位最終以一口價261萬元成交，劉Sir收到風，曉麗苑單位買家係早排買咗藍田居屋康栢苑無契盤嘅投資者鬍鬚余，佢上月初用咗186萬元買入康栢苑一個低層無契單位，低市價約一成。

伍冠流話，曉麗苑低層同類有契單位一般市值約330萬元，不過呢個盤無契唔可以做按揭，加上要等住客搬走先可以成交，以呢口價嚟講，都算係合理價。如果按佢講嘅市值計，今次成交價比市價低約兩成。

同區代理美聯何家豪話，曉麗苑盤源短缺，近月只錄到幾宗成交，其中F座高層一個面積約877方呎單位，以約388萬元成交，呎價約4,400元，同唔少私樓睇齊。

計埋今次嘅曉麗苑，鬍鬚余唔夠兩個月，已連環買兩個無契居屋盤。

除咗折讓大嘅無契盤受追捧，連唔受額外印花稅限制嘅工商物業亦連獲承接。荃灣工廈新盤ONE MIDTOWN中層19室及20室，尋日喺同一拍賣場上以約530萬元摸出，呎價約3,236元。

金鐘匯中心高8%拍出

另外，金鐘匯中心低層5室，面積約395方呎，喺另一拍賣場上以462萬元沽出，較開價搶高約8%，每方呎成交價達約1.17萬元。

另薄扶林愛琴苑地下單位，面積約1,639方呎，稍後連車位推出拍賣，開價2,100萬元。