股海實戰：中芯留意短炒機會

吊頸都要抖抖氣，尋日A股回穩，港股低開32點後，最低見過19,639點，游資見唔多跌得落，就掉頭博反彈，結果恒指成功終結八連跌，但出埋奶力都係升得159點，收報19,894點，成交增至567億元。

中央再度出招，上海市近日對限購政策加添新規定，即單身上海戶籍人士不得購買第二套住房，本港內房股個別發展，中國海外（00688）、合景泰富（01813）低收，潤地（01109）、恒大（03333）、碧桂園（02007）、富力（02777）及雅居樂（03383）則報升收場。可見即使經濟數據欠佳，中央都不會放鬆對內房嘅調控，決心咁大，出發點係長痛不如短痛。站喺投資者嘅角度，中央為房市拆彈，眼前內地經濟可少了一瓣擔憂，長遠亦必定係好事。

組合營擴充產能

好耐冇睇過嘅中芯國際（00981），尋日宣布與北京市經濟和信息化委員會及北京經濟技術開發區管理委員會，簽訂相關嘅合作框架文件，各方擬成立合資企業，重點生產45至20納米集成電路，冀能最終達致每月約七萬塊12吋晶圓的產能，但未見披露投資額及股權分布等詳情。

中芯做晶片，有政府支持，又已上市，可以話冇咩缺，偏偏這麼多年業績都令股東失望，好唔容易等到解決同台積電嘅糾紛，高管亦已換人，除獲上實集團不離不棄、化敵為友引入台積電為股東外，大唐電信同中投都揸住公司嘅可換股優先股，粒粒巨星拱照，但業績同股價仍未見大翻身，一○年轉盈賺過1億銀後，一一年再蝕24億元，今年首季業績仍然見紅。現價0.37元、市帳率0.58倍，市值僅102億元，睇見咁嘅局面，小股東點會唔心如止水？

今年首季，公司取得2.68億美金貸款額度及一項6億美金嘅銀團貸款，咁嘅底子仲唔使憂攞唔到貸款，全靠股東牌頭所賜。雖然喺北京有新Project，但股價冇動靜，相信炒高做批盪嘅可能性唔大。

阿莊對中芯呢隻股可謂又愛又恨，心淡了唔敢再叫人繼續長等，至於短炒，呢隻股勝在唔同民企，唔使怕關門大吉，加上據講中投同大唐揸住嗰批可換股優先股會喺今年六月四日強制換股，實際換股價為每股0.539元，現價較之折讓三成有多，此前不妨留意吓股價有冇異動。