樓市出更：用家搶盤嚇窒內地客

樓市小陽春下大批本地用家搶入市，加上內地經濟持續放緩，今年首季整體私人住宅內地個人買家入市比例得番約10.6%，較舊年第四季約14.4%高位跌咗約3.8個百分點，仲創埋近四個季度新低。劉Sir相信比率回落係本港用家「瘋冚」入市所致，所以期內二手買賣中內地客的比例，亦按季跌約2.7個百分點至約7.4%。

近排本地用家再度活躍起來，積極喺二手市場尋找安樂窩，令來港置業嘅內地客客源比例驟減，劉Sir參考中原數據，發現首季整體私宅買賣當中，已知內地個人買家比例，按季跌咗3.8個百分點至10.6%，所佔成交金額亦下挫約6.9個百分點至約17.4%，兩者都係近四個季度新低。

如果用土地註冊處嘅住宅買賣數據推算，上季共錄約18,749宗住宅登記，其中約10.6%屬內地買家，即係內地客成交佔咗約1,987宗。

入市二手金額6季低

不過，數字實質上同舊年第四季差唔多，因為當季整體私宅成交只係得13,739宗，計番14.4%內地客比例，即佔約1,978宗，睇番其實近兩季內地客來港入市宗數分別又真係唔大。

另方面，該行數字又顯示，整體私宅內地買家比例減少，主要是受到二手市場拖累，期內已知內地個人買家比例按季減少約2.7個百分點至7.4%，涉及金額亦減少約6.1個百分點至9.1%，所佔金額比例更創近六個季度低位。

內資撐新盤價量俱升

無可否認，內地客確係比較鍾情入市本港新樓，劉Sir發現，今年首季一手市場內地客所佔成交比例逆市上升，對比舊年第四季升咗約3.1個百分點，比例佔約31%，而成交金額則佔約37.3%，按季亦升約2個百分點，反映內地客仍然係本地新盤市場最重要嘅客源。