魚缸Blogger：中遠太平洋諗得過
阿爺做嘢真係估佢唔到，之前市場一直傳人行會調低存備金率，但一直都無聲氣，點知禮拜六就失驚無神宣布調低存備率50點子。事實上，內地啱啱公布嘅經貿數據表現咁差，阿爺點都要出手做嘢，估計今日恒指可以結束七連跌。
內地出入口數據欠理想，首當其衝當然係航運股，中遠太平洋（01199）上個禮拜連跌四日，日日插落嚟成交都唔細，睇到都驚，但係股價跌到落10元邊，似乎都頂得下，周五個市仲跌緊，而佢就逆市先行反彈超過2%，且成交都見配合。雖然航運股前景認真麻麻，但以走勢睇，中遠跌到現水平，市盈率唔夠十倍，息率有四厘幾，短線買入博反彈絕對諗得過。
中遠太平洋（01199）
阻力位：11.5元
支持位： 9.6元