股海實戰：領匯兩電避險唔少得

人行終於決定調低存款準備金率50點子，預計可向市場釋放4,000多億元人仔，但係咪足夠刺激疲弱嘅經濟，存在疑問，特別係見到四月份消費品零售總額及工業增加值數據差勁，僅僅降存備率一招未必能止住跌勢，係咪會有其他新措施，如減息，甚至係擴大放水規模，將成後市焦點。

港股連跌七個交易日，恒指由月初高位21,385點，回落至上周五低位19,901點，累跌1,484點。計及降存備率因素，預計本周初恒指可重上兩萬點樓上，但未宜對反彈動力作太大憧憬，畢竟外邊風頭火勢，歐債問題同中菲關係緊張發展難測，若周初高開幅度太大，高追宜三思！

沽空透明度要提高

上周港交所（00388）宣布收緊股票沽空條件，但其實今次動作對空軍部署影響唔大，皆因唔合新沽空資格嘅股份市值細且流通量低，本身就唔係空軍嘅搵食對象，對大市影響亦唔大。阿莊認為，要根本解決問題，單係一招增加沽空運作透明度經已有效。點解咁講？以舊年八月歐債危機爆發，空軍肆虐為例，阿莊得悉幾家專門做股票沽空交易嘅大行經常互通沽空交易盤數據，1隻股票流通量有幾多，街外有幾多基金持貨可供借貨沽空，佢哋瞭如指掌，所以嗰排空軍可以肆無忌憚﹗但散戶投資者根本無法得悉相關數據，結果喺一個極不公平嘅遊戲規則下任人魚肉。

眨眼又到咗五月，仍停留喺股市嘅資金應如何部署？若半年結前祖國加大「放水」力度，高風險高回報嘅應博內房股，如恒大地產（03333），較穩陣就揀內險股，如新華保險（01336）。不過，做定兩手準備，如半年結前再有一次全球股市大崩圍，咁又如何？

回看去年跌市，有兩個發現。首先，喺去年八月嘅大跌浪中，領匯（00823）股價最多僅跌約7%，且見低位後四個交易日經已收復失地。其次係，兩隻公用股中，中電（00002）同電能實業（00006）去年八月低位反彈至翌月高位幅度均超過15%。咁講法，嚟緊環球股市又再大變天嘅話，先買入領匯避風，然後喺技術指標呈嚴重超賣下再轉揸兩隻電力股，有機會避過一劫兼讓持倉跑贏大市。但當然，每次股災變數唔同，參考還參考，投資者要靈活變通，且量力而為，冇得輸打贏要！