九肚地無限量顯身價

沙田九肚第56A區豪宅地同埋將軍澳第66C1區限量地，將會喺今個星期五截標，作為本財政年度首次政府土地截標，劉Sir個人認為政府今次做法幾聰明，本季推出4幅地，只有沙田九肚地唔加入發展限制，所以市場都睇得唔差，估值最高達5億元，相信去年率先喺區內「插旗」嘅信置（00083）等都有機會去爭；連同將軍澳限量地，預計兩地為庫房帶來逾15億元收入。

沙田九肚新發展區同埋將軍澳區都係為未來土地供應嘅主要來源，嚟緊星期五截標嘅兩幅土地，以九肚第56A區B5地盤較受市場關注，因為土地未有加設單位限制，設計上會較靈活同埋彈性較大，相信價值會比起舊年「一口價」賣出嘅沙田九肚第56A區A地盤限量地為高。

九肚豪宅料呎價萬元

高緯環球張翹楚同劉Sir講，沙田九肚呢幅地可作高檔別墅及豪宅發展，預計樓面地價每呎約7,900元。而第一太平戴維斯更加估計樓面呎價可高達9,925元，係目前市場上限價，如果以呢口價成交，即係較去年由信置及嘉里建設（00683）等合組財團投得嘅同區地皮，大幅高出約86%；而市場估值則介乎約3億至5億元。

將軍澳限量地值十億

另將軍澳區一帶土地用作限量發展，市場已當「慣例」，所以劉Sir覺得有關限制對地價唔會構成太大影響；地皮將提供商業同住宅樓面，分別約2.34萬及23.4萬方呎，限建單位介乎310至326伙，市場估值約9.79億至10.31億元，即係樓面地價每呎約3,800至4,000元，呢個水平與區內其他已售限量地價錢相若。