市場徐想：珠管實力備受肯定
珠江鋼管（01938）係中國最大嘅鋼管製造商，亦係最先喺中國製造直縫埋弧焊鋼管。集團除咗提供鋼管製造服務外，亦可以將客戶提供嘅鋼卷、鋼板，進一步加工成鋼管，同時亦向客戶提供塗層同埋管件等等配套產品同服務。
集團嘅鋼管產品可分為直縫埋弧焊管同埋電阻焊管，可以生產到符合X80標準嘅直縫埋弧焊管，亦已取得挪威船級社（「DNV」）同埋美國石油協會（「API」）等多項國際認證。此外，集團係中國首名成功研發出1,500米深海焊管嘅製造商。
集團可製造海上工程使用嘅海底管，故此已被劃入「十二五」規劃期間海洋工程裝備製造業企業，得到國家戰略性政策所提供嘅優惠，包括得到中國政策性銀行嘅大力支持外，同國家開發銀行及中國出口及信用保險公司等等，亦保持住良好合作關係。公司一一年盈利上升228%，息率1.85厘。繼續追蹤、出發！