股海實戰：港華燃氣逢回吐收集

呢期投資市場真係多事之秋，搞到金股匯冇瓣掂。恒指尋日埋單再跌103點，期指跌穿兩萬點大位，刺激全日成交張數增至8.7萬張，窩輪及牛熊證佔大市成交比重亦增至約27%，反映股票現貨市場冇大作為，炒家轉炒期指等衍生工具賭大細。值得一提，尋日尾市期指多插逾百點，收報19,923點，大低水304點，即使扣埋除息因素，實際低水亦逾百點，真係瓜多過菜！若然今日出埋CPI後A股跟插，港股後市頗大機會繼續尋底，最差情況要落番19,200點水平先至有似樣反彈。

國泰航空（00293）發盈警，股價挫6%。查實行業經營困難唔係航空業獨有，喺租金高企之下，香港零售同飲食業一樣咁艱難，而從內地最新公布嘅貿易數據可見，製造業亦未脫險境。下半年香港經濟或進一步惡化，各位要做好對抗經濟逆境嘅心理準備。

工信部表態挺醫藥業購併重組，見廣州製藥（00874）再升5.9%，阿莊沽早咗成蚊，真係失覺晒！周一阿莊話可以等回吐買貨嘅聯想（00992），真係如願以償，其股價由周一高位7.65元回落至前日低位6.91元，尋日晨咁早喺7元樓下排定隊，諗住博大霧走一轉，點知隻股裂口高開，收報7.14元，逆市升2.5%，惟有觀望反彈力度再定對策。

早前阿莊分析過受多方垂青嘅中國燃氣（00384），事實上，中資燃氣板塊嘅盈利前景可測度較高，將繼續吸引避險資金進駐。講到呢類股，作為中華煤氣（00003）拓展內地市場旗艦嘅港華燃氣（01083）亦係實力之選，去年純利增長62%至7.09億元，主要受惠毛利率上升及注資效益。繼去年喺江西、湖南、安徽、遼寧取得5個新項目，今年初又在遼寧新增兩個新項目，估計五年後這些新項目嘅總氣量合共約為6億立方米。

實力買盤積極接貨

今年初，港華股價才約4.2元，尋日升到上歷史新高5.89元，大淡市下真係唔講得笑﹗權益披露資料顯示，今年三月以來澳洲聯邦銀行先後兩次在場內減持港華，但其股價照升可也，顯示另有實力買盤積極接貨。大股東煤氣預期，未來一兩年內地業務將持續保持雙位數字增長，到明年內地業務佔整體比重將可超過香港業務，大概描繪出港華嘅增長前景。喺今年企業盈利前景一片迷茫之下，港華可視為奇葩，股價將繼續跑贏大市。以一二年預測PE十七倍計，合理價6.1元，可逢回吐收集。