樓市出更：筲箕灣舊樓收購話咁快

港島區樓花新盤最近幾年愈賣愈好價，好似新地（00016）旗下嘅i．UniQ系列，舊樓重建以樓花發售嘅兩個項目，開賣價講緊每呎「萬萬聲」，所以吸引財團積極收購舊樓，好似舊年八月先向土地審裁處入稟，申請強拍嘅筲箕灣工廠街及教堂里舊樓，劉Sir打探到，收購行動已接近尾聲，幢大廈依家剩番唔夠10伙同幾間地舖仲未搬走。

據悉，筲箕灣工廠街11至25號、教堂里6至8號及5至19號，以及筲箕灣道385至399號呢批舊樓，舊年八月被財團「斬件」成7宗個案，向土地審裁處申請強拍，劉Sir收到風，當中6宗申請個案裏面持有業權嘅小業主，近幾個月陸陸續續將單位賣出，住宅單位成交價由約290萬去到550萬元不等，地舖就賣咗約莫1,000萬元，全部都已經上晒土地註冊處登記，意味項目收購已經進入尾聲。

賠償額買唔番原size

入稟申請強拍呢批舊樓嘅主要公司係忠誠國際企業有限公司，公司董事陳國堅，同新地物業投資部要員陳國堅中英文名一樣；而另一個董事鄺德權，就同寶輝控股執董同名，劉Sir記得鄺生間公司曾經喺筲箕灣發展過單幢豪宅君悅軒。

舊樓對面嘅長城物業陳敬陽同劉Sir講，對面幢樓嘅住戶陸續搬走，剩番只有10個住宅單位同幾間舖未搬。至於攞咗賠償嘅業主揀邊類樓，佢話：「大部分住戶都可以買番同區樓齡約二十年嘅單位，不過，單位面積就無以前四、五百呎咁大，好多都只係夠買番個細少少嘅單位。」

東區樓花呎價全逾萬

美聯物業（01200）助理區域經理黎泳傑話，港島東區之前賣緊樓花嘅3個單幢新盤，二手放盤每呎叫價1.2萬至1.85萬元，其中i．UniQ譽．東，目前二手放盤每呎叫價1.38萬至1.67萬元。

而西灣河港島．東18，市場有約10個放盤，每呎叫價約1.2萬元起。