Fundman睇市：跌市有理由無謂賴秋官

雖然法國總統選舉前夕，奧朗德民望一直大幅領先，市場亦已預咗佢會贏，呢兩個禮拜股市表現大致冷靜，點知尋日魚缸先見真章，恒指大跌549點。

法國總統由一個左仔當選，有幾弊可思過半，國家本身已一窮二白，仲要回歸福利主義，向有錢佬徵收75%重稅匪夷所思，因為有錢佬通常愛錢多過愛國，收重稅嘅下場只會變成有錢佬大逃亡，希臘已係前車可鑑。最重要係德國失去盟友變得孤掌難鳴，下次選舉就到默克爾面對壓力，所以尋日早段德股跌得仲多過法股。希臘國會選舉亦係亂到七彩，將來或可能推翻原本嘅救助方案，花旗話希臘退出歐元區嘅機會升到75%，危機比法國更大。

今日或有技術反彈

法希選舉可以聯想到好多災難性後果，但卻不會朝夕之間發生，歐股早段大跌後，德國公布三月份製造業定單上升，跟住跌幅已經收窄，歐元亦由1.3樓下彈番上1.3樓上呢個心理關口。港股期指雖然實際低水幾十點，但連跌3日之後已大致反映負面因素，今日不排除有技術反彈。

上周三恒指曾經升破保力加通道頂部，大有衝頂氣勢，而牛證街貨量亦大增，卻原來只係走勢陷阱，尋日又下試250日線，呢兩、三個月所有移動平均線、黃金交叉、死亡交叉全無參考價值。五月最大嘅炸彈已經引爆，所以短線股市可能先回穩，但中長線兇險度卻增加。

尋日航運股同碼頭股都係重災區，反映投資者認為歐洲會有排衰，長遠最終歐債危機會蔓延向法國，最慘係歐洲人唔肯面對現實。但六月會有個轉機，乃因美國QE3呼之欲出，近日美國經濟轉差係契機，QE3藥效好短，所以時間會校到大選前幾個月落藥，根據劇本，一早已定好係年中。

講番港股，尋日恒指及國指分別跌2.6%及2.8%，跌幅係區內之冠（日本因停咗兩日市要追跌2.7%），連滬深300指數倒升亦救唔番港股，成交增至613億元，港匯跌至7.7633亦有心理影響。雖然有大行叫人五月又long又stay，但淡馬錫更有先見之明，上星期趁高減持內銀股可算一絕。好多人又賴「秋官」有新劇推出整冧港股，但講句公道說話，呢個魔咒有時靈有時唔靈，只係隨機性。

滙控（00005）今日公布首季業績，據大行預測會有顯著增長，但昨股價先挫2.8%。中移（00941）回吐0.7%仍算強勢，據內地媒體報道，下個禮拜中移會安排學生做TD-LTE用戶測試，4G登場時間可能提前，股價亦特別精神，但推4G唔代表ARPU一定會升，只係唔使好似3G一樣捱打。

港交所（00388）首季少賺7%，每日成交額同新股集資額都有數得計，所以同市場預期差唔多，焦點仍落在洽購倫敦金屬交易所單交易，但短線有機會繼續跑輸大市。購併例牌要付出高價，中國燃氣（00384）收購戰殺出北控集團呢個程咬金。點解中燃會咁搶手呢？皆因每個地方只可以有一間燃氣商經營，所以燃氣股不惜孭下巨債都要「霸山頭」，中燃唔經唔覺已取得百幾個經營權，當中唔少只係小城鎮，短期的盈利能力欠佳並不重要，因為隨住中國經濟嘅增長，最值錢係佢嘅燃氣網絡。