股海實戰：中國燃氣唔憂冇得炒

歐洲政局大變天，恒指尋日玩笨豬跳，大幅低開427點，最低見過20,477點，收報20,536點，跌549點，成交增至613億元，被喻為港版「恐慌指數」嘅恒指波幅指數急抽18%，升3.5點，收報22.29點。技術上，恒指一下子跌穿10日及50日線，雖然埋單250日線幸保不失，但本來10日線有勢重穿50日線，如今黃金交叉希望落空，短線維持喺20,000至21,300點水平玩高低槓，想買貨唔爭在等落多三幾百點至出手。

尋日港股跌勢全面，中資股可謂全線「大飲茶」。廣交會累計出口成交額環比及同比下跌，且逾八成為中短定單，顯示出口復甦尚須時日，加上歐局動盪，航運股中遠太平洋（01199）及招商局（00144）首當其衝，分別跌8%及6%。

中石油疑幕後發功

尋日中國燃氣（00384）股價逆市升4.1%，事緣北控集團上周以每股4.1元從阿曼國家石油手上購入中燃約2.38億股，另於市場按平均價每股3.87元購入約1,100萬股，令持股量由3.28%增至8.96%，成為中燃第三大股東。

本來，新奧（02688）找來中石化（00386）合作向中燃提購可謂無敵組合，對於每股3.5元嘅收購價被指出手低，提購方一直企硬。如今北控集團以「程咬金」身份殺出，由於其分屬北京市最大國企，且其與中石油（00857）旗下嘅昆侖能源（00135）共同持有中石油北京天然氣管道公司，而北京嘅氣源一向由中石油提供，喺咁嘅背景之下，不難令人聯想今次北控集團出手，背後有中石油嘅支持。

過去中石化喺下游方面嘅發展，一直較中石油為快，唔排除今次中石油以北控集團出面截擊，係同兩大國企油企競爭有關。若中石化同新奧企硬唔肯提價，成功收購機會大減；一旦事敗，新奧所受嘅負面影響肯定比中石化大；若提價迎戰，新奧要過股東嗰關，變數甚多。究竟如何拆招，就要等着瞧！

萬一中石化及新奧退出收購，阿莊認為對中燃嘅負面影響有限，皆因北控集團既已成公司主要股東，未來購併重組古仔仲有排玩。補充一句，從板塊角度出發，首季燃氣股表現跑贏大市，喺宏調持續及經濟增速放緩下，燃氣板塊憑着現金流高及增長前景明朗，可繼續跑贏大市，而喺市場份額日漸歸邊之下，長揸選股致勝規條，當然係唔大唔買！