牛熊對壘：趁領匯調整撈17651

雖然上周四及五港股表現偏軟，但五月份首個星期計，恒指仍累升1.66%，至於A股亦則受惠交易費用下調，上周勁升逾3%，打破投資市場所謂Sell in May的傳統。

上周五恒指牛證及認購證共錄得2,645萬元資金流入，淡倉同日有4,282萬元資金流出。截至周四止恒指牛證總街貨相當於6,539張期指，熊證總街貨只有4,390張，牛證街貨約多出熊證街貨一半，可見大家對後市睇法一面倒。不過，每逢牛熊證街貨差距出現一面倒時，大戶都會乘機出手，結果又是大多數人做錯了。建行（00939）及中行（03988）被淡馬錫減持，港股上周五跌163點，諗住「食住上」的大多數被迫跪低。

按牛熊重貨區分布，大戶仲未殺到去牛證重貨區20,300至20,799點，該區街貨近15億份，但美國四月份非農業職位增長係半年來最少的一次，上周五美股急跌168點，全周計下挫2.4%，上述重貨區今日極大極會面臨挑戰，好友應係有得震無得瞓。

說回上周五港股全日高低波幅又係得一百點多些少，真係睇到都悶，牛熊證成交按日跌近兩成，只有49.24億元，窩輪稍好，成交仲有63.88億元。市值二千幾億元的新地（00016）爆出大哥郭炳湘被拘留，周五午後復牌，半日成交8.25億元，相關論證跟住一齊復賽，錄得8,300萬元成交，較上日成交足足多出十六倍。

新地沽輪揀唔落手

新地周五埋單跌1.8%，收報92.6元，諗住博反彈的，仲可以在市場慢慢揀，選擇不少，但若睇淡要做Put，價外Put輪都係得5隻咁大把，槓桿平均得兩倍幾，仲要提防正股隨時又停賽的風險，確實唔易揀。

恒指現正考驗20,800點支持位，但現時買沽輪的風險亦都唔低，不如轉吼強勢股，實行炒股唔炒市。領匯（00823）上周一創歷史新高後現調整，可趁機落手。領匯麥銀購（17651）行使價31.88元，實際槓桿5.9倍，到期日明年二月四日，引伸波幅33%。