股海實戰：聯想可待回吐買貨

淡馬錫沽內銀股，但無損A股表現，上周五滬綜指創三月十四日以來即市及收市新高，深成指則創今年以來新高。上周四人行展開650億元人仔七天期逆回購操作，雖然此舉或暗示降準行動冇咁快出現，但唔多唔少反映官方正積極以多種途徑緩解市場流動性壓力。

新地（00016）高層捲入廉政風暴餘波未了，幸好如今地產股佔恒指嘅比重唔到9%，相信消息對恒指嘅直接影響有限。今年民企股好似犯太歲，唔係拉閘復牌無期，就係畀班大戶沽到落花流水。

華寶空軍未收手

國美（00493）自三月中以來股價累跌46%，市值蒸發逾190億元；上周五復牌嘅華寶（00336），股價曾低見3.26元，單日成交5.77億元，沽空比率約26%，空軍未肯收手，都係做旁觀者為妙。還記得上月初「渾水」表明短期內會就民企發表一份新嘅沽售名單，上周五市場便開始流傳一份疑似名單，宜提防空軍再度發功。

阿莊持有嘅信義玻璃（00868），本諗住坐定粒六喺5.5元食胡，點知踢到上5.3元就掉頭，遂以5.14元沽出6萬股，候低再諗過。

另一方面，阿莊正密切留意聯想（00992），事關如無意外公司將於月底宣布截至三月底止年度業績，應該會報佳音。

阿莊三月下旬曾建議中長線收集聯想，當時股價未到7元，上周五收報7.66元，逆市升3.5%。雖現價往績市盈率已去到三十四倍，但截至去年底止首三季度，聯想經已賺4億美金，全年度純利或可達5.5億美金，即使打個九折，市盈率將降至廿倍。以呢個估值買入本年度頗大機會問鼎全球最大PC生產商寶座嘅聯想，並唔係貴，只係考慮到短期市況因素，暫且忍忍手，相信仲有機會喺7.5元樓下搭尾班車！

Tip股我至Top

藺俠（4/27）Tip中壽美林購（16240）最多升46%

錢進（4/30）Tip合富輝煌（00733）最多升9%