樓市出更：投資老手：樓市無得炒

近排樓價不斷破頂，好多人都覺樓價好貴，呢個時候反而有資深投資者復出樓市，好似啱啱斥資3,000萬買咗大埔比華利山別墅示範屋嘅黃熙仁（Rocky），就係再度入市，Rocky喺地產打滾多年，入市自然有佢道理，睇嚟樓市仍然好穩陣。

劉Sir同無炒樓都有十年嘅Rocky傾開，Rocky話，樓價已經過晒九七高峰，依家樓市係無得炒，只可以長線揸。

短期或調整 冧市較微

不過同九七唯一唔同嘅地方，就係以前供樓利息要成10厘，依家只係2厘，完全係兩個世界，所以發展商都好醒，新樓售價唔會平，而佢覺得，短期樓價係會有調整，但係除非個經濟好差，否則要樓價跌30至50%係好難。

既然樓價都咁高，點解Rocky仲响呢個時候入市。佢話都係隨心，睇到屋仔供應少，加上買入嘅比華利山別墅洋房係示範屋，唔使煩裝修就可以出租，所以咪入市，而Rocky話佢預算埋，即使加息2厘仍然負擔得嚟。

佢仲話，「依家投資真係要量力而為，唔同以前，要審慎好多，有10蚊先會攞1蚊出來投資。」並且要預咗自己有守嘅能力，所以佢都好贊成政府在樓按成數方面做好把關工作，令樓市更健康。講番Rocky無炒樓咁多年，究竟仲有幾多樓揸手？佢話樓只係佔佢投資組合約莫一成半，即係2至3億左右，買入嘅豪宅，部分收緊租。

商廈咪掂 買舖諗得過

至於嚟緊會點投資，佢話邊區買舖都無問題，因為中國人始終都鍾意做生意，所以睇好舖市，而寫字樓就暫時唔好諗，因為睇甲級商廈嘅租金會跌三成。

至於昔日最難忘嘅事，係投資元朗加州花園一役，由呎價2,000餘元購入單位，最後以高達7,000元沽出，不過佢話炒樓嘅日子已經過去，依家會較專注旗下3間中環會所嘅生意。