Fundman睇市：零售股炒風難再現

四月滙豐PMI低位反彈見49.3，加埋官方數字連升五個月，去到53.3，中國經濟首季見底，成市場新共識。假期時，澳洲減息半厘救經濟，加上內地研究減低股市交易費用，踏入五月首個交易日，恒指升214點，報21,309點，即市高位見過21,385點，差10點便掂到二月廿日21,760點高位延伸出來的阻力線21,395點。

以兩三日超短線睇，港股確係超買，但二月至今，大市困在20,000至21,760點，千幾點波幅玩足三個月，近期壞消息不跌，好消息加多兩錢肉緊的走勢，睇嚟好淡友已屆決一決生死之時。基金消息指long only昨日買盤全面，所有押注祖國經濟復甦的中資股，都見大行蹤影，最標青是內銀、內保、券商，較弱的是建材及先行一步的內需消費股份，心水仲係內地券商股，中信証券（06030）外，海通證券（06837）早前招股因應市況，怕大孖沙縮沙提早拉閘，估唔到有意想不到效果，唔少芬佬後悔入飛入得太保守，補倉潮加埋內地傾斜政策，短期密切留意。

剛過咗五．一黃金周，近兩日，媒體報道集中訪港旅客消費增長有放緩迹象。瑞銀就出報告，維持全年本地零售銷售增長放緩，只有6至7%按年升幅之預期，仲特別提到，過去兩年零售商舖租金幾近翻了一番，營業額增長不及租金升幅。事實見到今年大行對零售股興趣麻麻，黃金周後，等銷售數據出籠的期待感大減，相信今年零售股再現炒風的機會渺茫。

聞樓梯響多時，港交所（00388）終承認競購準備賣盤的倫敦金屬交易所（LME）。近年，中國能夠安排來港上市的國企龍頭，經已來得八八九九，延長時段證明對刺激交投無幫助，今年首季，港股日均成交額得632億，比去年全年日均697億少近一成，四月以來，大市長期得四、五百億成交，港交所選擇走出去，擴大市場闊度，看來是無可厚非。

港交所短期走勢續弱

LME成立於1877年，是全球最老字號金屬交易中心之一，更係少數採用會員制結構的交易所（每年釐定交易費用，主要以之前一年，LME所獲利潤成反比），既是非牟利機構，市場提出10億英鎊或者126億港元估值，主要建基於收購前會先加入牟利成分，例如提高交易商佣金。LME現時交易九成五來自英國以外，去年完成1.466億手金屬期貨合約交易，相當於15.4萬億美元或者日均610億美元的成交額。

港交所市值1,355億元，是LME晒士的10.7倍，先不談芝加哥交易所、紐約泛歐證券交易所等知名競爭對手，成功爭奪LME的機會，單是收購可能引發的借貸或者批股陰霾，經已令港交所股價由高位148.9元，累積調整一成五。觀乎近期130至145元之間累積沽空唔少，大行預測全年賺51.5億元，仲比去年50.9億元稍高，但如果年內港股不是先低後高，下半年日均成交額唔能夠重返700億元樓上，看來預測是傾向樂觀，港交所跑輸大市局面，可能仲會持續一段時間。