股海實戰：光控博財息兼收

內地A股五月開門紅，滬綜指重上2,400點樓上。北方魚缸做好，本地魚缸亦欣然受惠，恒指喺本周一升穿21,000點後，假後復市頭也不回，一度抽上21,385點，收市報21,309點，升214點，成交額增至579億元。技術上，恒指10日線與50日線嘅距離正逐步拉近，一旦出現黃金交叉，有勢向二月高位21,760點推進。

官媒報道，四大行四月份截至廿五日新增信貸僅千億人仔，呢個唔係好消息，偏偏又被解讀為信貸增速回落，反映信貸市場需求仍然疲弱，「微調」措施將陸續有來。

國美沽壓未消

尋日提到國美（00493）剛破位唔好心急撈貨，果然股價沽壓未消，尋日再挫跌11%，成交達9.33億元。阿莊就聽到有投行中人話，三月份見國美ELN接貨價喺1.9元水平、年息率逾廿厘，條款夠吸引，遂替客戶買入諗住揸兩個月可以財息兼收，點知公司公布完年度業績就觸發大跌浪，近日更發季度盈警，隻股被質到屁股開花，如今惟有預咗接貨，收息遠唔夠輸價！

組合中持有嘅信義玻璃（00868）終於開車，高位做5.3元，一於安坐順風車。券商股氣氛明顯改善，上月阿莊亦曾提過，打從中央拋出金融改革課題，已說明未來政策將由過去向銀行業傾斜，改為積極扶持證券行業加快發展，加埋近次下調A股交易費用，進一步確認政策方向，相信板塊利好氣氛可持續一段時間。

新股海通證券（06837）尋日股價升6%，同類股中信証券（06030）亦升1.96%。若然短期海通繼續炒上，老牌紅籌光大控股（00165）亦諗得過，見尋日其股價裂口高開，收市升4.87%，報12.92元，成交852萬股，乃一月上旬以來最大單日成交。圖表顯示，去年末季以來底部支持上移，尋日大陽燭已升穿上月高位，成交配合，論勢確實有睇頭。公司派發末期息每股0.3元將於本月十八日除淨，若此前板塊氣氛配合，其股價又能企穩250日線12.7元樓上，呢轉目標挑戰二月高位14.84元，博順道收埋股息，10日線支持喺12.3元。

Tip股我至Top

藺俠（5/2）Tip

A中瑞銀購（15174）

最多升21%

關焯照（4/30）Tip

熔盛重工（01101）

最多升9%