樓市出更：老牌豪宅半世紀賺378倍

香港嘅豪宅供應一向唔多，所以頻頻出現天價成交，不過，原來一啲老牌豪宅原來升值潛力都相當之好，好似樓齡已經有四十七年嘅黃泥涌峽道利安閣，啱啱有一個高層單位以5,308萬元賣咗，呎價雖然唔夠2萬元，但原來業主六五年一手價買入只係14萬元，計落升幅有378倍，升幅拍得住商舖物業。

中原張偉光同劉Sir講，超過一年無成交嘅利安閣，啱啱有個高層A室賣咗，面積2,800方呎，擁四房一套房間隔，望到開揚山景，呎價約18,957元，買家係本地用家，原業主於六五年以14萬元向發展商購入，依家帳面賺5,294萬元。

零星放盤叫六千萬

劉Sir聽聞，喺四十七年前已獨具慧眼買入呢個單位嘅業主，係嚟自一個會計師家族；而大美人李嘉欣個家姐李嘉明或有關人士，喺一○年亦曾以4,800萬元買入同廈一個低層B單位。

至於利安閣由於只係得二十幾個單位，所以放盤可遇不可求，依家有個別零星放盤，但全部叫價都超過6,000萬元，相信下一個成交又會創新高價。

禮頓山呎價二萬八

講開東半山，近期雖然有幾個新盤開賣，但係都無影響到區內二手市場嘅承接力，好似跑馬地禮頓山5座有一個高層A室，面積約2,238方呎，最近以6,280萬元賣出，呎價約28,061元，係唔錯水平。

而一向交投唔多嘅大坑保祿大廈，近日亦有一個低層B室以2,430萬元賣出，以面積1,465方呎計，呎價約1.66萬元。

除咗東半山之外，西半山近日 都頻頻錄到「九七貨」賺錢成交，美聯劉錦梅表示，一名換樓買家以約927萬元買入西半山蔚庭軒高層D室，以面積約778方呎計，呎價約1.2萬元，原業主九七年持貨至今帳面賺約237萬元。

寶馬山放盤即日沽

由於市場相當渴盤，所以有部分單位一放盤即售出，中原陳家鴻就話，北角寶馬山花園1座高層A室，面積1,143方呎，由於望到尖東海景，屬優質單位，所以放盤首日即刻有買家以1,430萬元承接，呎價約1.25萬元。

世紀21北山嚴智贇表示，同區峰景大廈中層F室，面積2,216方呎，最近以2,400萬元賣咗，單位十三年升值約2.64倍。