股海實戰：廣藥有條件見8元

標普調低西班牙信貸評級，但上周五股市未有太大反應。另一方面，本周一、二，內地A股勞動節休市，周三復市後，中美新一輪戰略與經濟對話勢成市場焦點。上周四、五人行連續兩日將人民幣中間價定喺紀錄新高，好明顯又係為咗回應美方要求。講開又講，下調RRR一事由復活節講到勞動節都未見動靜。投資者等到頸長，睇怕真係減嘅時候，反應經已大減。

魚缸缺水難突破

又到傳統「Sell in May」嘅五月份，相信經歷了四月嘅淡靜市況，刻下股民「Buy」、「Sell」心態都唔太強烈。睇恒指走勢圖，10日線重上250日線後，兩線距離正逐步拉闊，現時250日線支持在20,518點，50日線阻力則處20,980點，而以二月份高點21,760點延伸的下降通道阻力位則介乎21,400至21,500點水平。惟要記住港股成交薄弱會影響技術分析準繩度，總之一日魚缸流動性未有大改善前，上落市格局難有突破。

官網第一股果有其號召力，上周五人民網首日於上海A股掛牌，兩度漲停板，收市價較招股定價高逾七成，只可惜港股人氣真係超低迷，本地科網股暫未能受惠。

廣州藥業（00874）上周公布首季度淨利潤1.22億元（人民幣．下同），同比增長40%，每股收益0.151元。鼓舞嘅係，季內公司經營活動錄得淨流入6,462萬元，而去年同期係錄得負數，反映今年首季公司銷售收入增加嘅同時，亦積極提高資金回籠，減少存貨。

去年廣藥全年純利才2.87億元，相比之下今年首季成績確實想當唔錯，難怪股價即刻有反應，上周五逆市升7.3%，收報7.35元（港元．下同），升幅7.3%。

早前廣藥母公司宣布資產重組，自此廣藥成為母公司嘅唯一上市平台，擁有母公司嘅主要醫療資產及業務，日後專注做藥品開發、製造及貿易業務，在完整嘅產業供應鏈配合下，有助提升競爭力，待上述重組計劃完成，相信可再次帶動估值上升，短線回吐須考驗10日線7元關承接，交投維持嘅話，呢轉有條件踢上8元。

Tip股我至Top

阿May（4/26）Tip

中國海外宏洋（00081）

最多升11%

積奇（4/24）Tip

中糧包裝（00906）

最多升7%