豪宅拍賣中港客拗手瓜

近期逾千萬嘅豪宅拍賣盤明顯增加，有私人拍賣行負責人話，依家豪宅拍賣盤比年初小陽春前，多咗最少三至四成，仲吸引到唔少內地客捧場，個別優質靚貨反應仲唔錯，最近就有豪宅特色單位被搶高100萬元。

劉Sir同拍賣行世紀21拍賣部阿Paul傾開，佢話依家通脹咁犀利，好多投資者都買磚頭保值，當中以供應較少嘅豪宅較多人吼，尤其喺市場甚少放盤嘅優質特色單位。

佢又話，公司依家每場拍賣都維持約20個單位放盤，其中豪宅佔達25%，比年初小陽春之前多咗最少三至四成，當中唔少係幾千萬元嘅豪宅物業。

銀湖特色戶臨時加價

阿Paul仲話，由於人民幣兌港元有匯率優勢，依家除本地客外，仲吸引到唔少內地客罕有喺拍賣場出現，好似烏溪沙銀湖．天峰特色單位，同港島南貝沙灣6期5座低層單位，同樣獲內地客出價競投。

阿Paul講番早幾日拍賣嘅銀湖．天峰一個極高層泳池特色單位，面積約2,500方呎，仲連2,000方呎天台泳池，由於屬市場罕有放盤，唔單止獲本地客垂青，連內地客都加入競投，更一度被搶高100萬元，至4,600萬元，不過業主方面臨時調升底價，單位最終收回，但業主考慮稍後會重新推出單位拍賣。

佢仲話，依家好多豪宅業主對後市走勢好樂觀，所以拍賣開價某程度上都反映佢哋幾心雄；唔少豪宅盤都貼近市價開拍，一般只係比市價低約2至3%，同小陽春前普遍開低5%以上好唔同。

近日拍賣場上有不少逾千萬元豪宅，當中包括壽臣山壽山花園高層單位，面積約1,740方呎，連兩個車位開拍價3,650萬元。

另外，何文田春曉園亦出現罕有放盤，稍後有高層單位連兩個車位，以1,600萬元開拍。