股海實戰：中食強勢莫估頂

美國聯儲局會議冇新嘢，伯老繼續無招勝有招。阿莊總覺得，呢期睇美股唔使咩大智慧，總之總統大選活動未完，美股都會繼續喺高位運行。同樣受政治因素影響嘅，仲有內地股市。十八大前上大人認真出手刺激經濟嘅機會唔大，主調仍然係跌得咁上下就托一托，直至十一月大局底定先至會有轉機。所以，至少呢一個季度，落場參與要就住嚟玩。

新股海通證券（06837）排除萬難，今日在港掛牌。尋日現貨收市後見暗盤交易嘅成交價較招股價微升1%，阿莊相信，呢隻股掛牌初期表現一般，跟進嘅話至少揸半年先知有冇押錯注！此外，持倉中嘅信義玻璃（00868），周初現大陰燭後好快收復失地，短線正醞釀向上突破，成交配合應可來個大反擊。

原料成本壓力降

尋日中糧系兩隻股價雙雙創五十二周高，其中中國食品（00506）高位做8.35元，收報8.27元，升4.95%；中糧包裝（00906）高位做5.21元，收報5.2元，升3.59%。今日集中睇睇中食，年初股價由6元邊起步，至今累升三成多，表現與其他一線消費股強勢一致。事實上，環顧中資股，民企股冇得諗、內銀內房又有波幅冇升幅，睇來睇去，獨消費股不但有國策扶持，加上原材料壓力紓緩，通脹受控亦為產品創造提價條件，毛利率有望得到改善，今年以來股價確係強得有道理。

估值方面，中食現價往績市盈率去到35倍，坦白講經已唔算便宜，保守預計今年盈利實現三成增長，預測市盈率亦已27倍。手上冇平貨底，現價才追入，猶豫可以理解，但睇見旺旺（00151）股價升完可以再升，加上次季股市大轉勢嘅機會似乎唔太高，消費類股仍能吸引避險資金留守，所以阿莊亦無意估頂。純從技術分析出發，尋日走勢呈突破，14日RSI處66，仲未算極度超買，若短線未肯回頭，下一阻力區睇8.6至8.8元區域，回吐主要支持喺7.7至8元。

Tip股我至Top

甘俊（4/23）Tip

威高股份（01066）最多升8%

錢進（4/16）Tip

南車時代（03898）最多升8%