觀塘地廠變巨舖嗌四億

觀塘有唔少商廈落成，區內工廈地廠租值同價錢大幅升值，唔少早年低位入貨業主都趁機出貨。昨日截標嘅開源道交界大單邊地舖，業主十多年前買番嚟開食堂，但後來收到幾間銀行洽租，於是斥4,000萬元將地廠改做商舖，租畀銀行，依家開價約4億元放售，係多年來區內最大宗舖位放盤。

上述舖位業主莊先生，本身係搞開凍肉生意，睇中觀塘區白領一族愈來愈多，而嗰區除咗舊式工廈飯堂之外，大型食肆都唔多，所以喺二千年初擲1,200多萬元，買入開源道63號福昌大廈地下一個地廠，開設食堂。

倘售出 賺幅近6.7倍

莊先生仲話，過去幾年觀塘舊式工廈十室九空，而開源道目前唔少巨舖都畀銀行租用。○七年嗰陣，有幾個代理同佢講，有銀行想傾租有關佢持有嘅地廠。莊先生鑑於銀行租金遠較食堂為高，所以佢喺○八年決定將上址申請改作商舖用途，現時個舖每月租金大約81.6萬元，租期至一四年。

依家觀塘地廠轉地舖個案集中喺開源道，租戶除咗承租能力強嘅大型銀行外，便利店同特色食肆等亦積極搶位，所以唔少舖位收租客都落區搵舖。中原（工商舖）林嵐話，上述昨截標嘅地舖，面積約4,200方呎，收到兩份入標，當中有舖位投資者。有代理話，個舖若以意向價4億元賣出，業主扣除購入價及補地價，帳面賺約3.48億元，賺幅近6.7倍。

廣東道舖貴兩倍洽租

講開舖租，聽講尖沙咀廣東道有個國際品牌租咗差唔多六年嘅舖位，有個國際珠寶店諗住以每月約600萬元打動業主預租，若成交落實，將較現租金多兩倍，而呎租超過2,100元，將成為九龍新指標。此外，美聯商業周永亨報料，投資者羅家寶今年首度出手買咗個上環信德中心東翼17樓09室，涉資約2,667萬元。

另有消息指樂聲電子（00213）等的中環干諾道中50號商廈，獲中資金融機構擬以逾50億元洽購。