Fundman睇市：淡友大把彈藥在手

港股經過周一近四百點跌幅後，尋日全日得個悶字，指數反彈52點，報20,677點，主板成交額回升到497億元，臨近四月期指結算，配合下星期內地黃金周假期，港股要跟晒歐美股市走，不過歐洲情況卻是難令好友安心。法國總統薩爾科齊兩星期後的二輪選舉中，有機會遭到滑鐵盧未能爭取連任。另一邊廂，荷蘭執政聯盟的削赤談判破裂，要提前大選，更有失掉三A評級的風險。

隔晚見法國、荷蘭、西班牙同意大利十年期債息通通上升，今次二輪歐債危機，唔再係小國希臘咁容易擺平，歐洲央行講明六月二十日G20開會先傾，其潛台詞係：成個五月同埋六月上旬，會任由個橙繼續爛落去，淡友應不愁沒有做淡的彈藥。再睇美股，正當分析員紛紛改口，唱蘋果公司股價可見1,000美元之際，這巨無霸股價卻從歷史高位644美元，回落超過一成去到571美元，美股有強弩之末的味道。筆者相信，恒指20,000點的心理關口，今次調整中，並非牢不可破。

不過，歐洲央行已嚐試過量寬的快感，錢能夠解決一切問題，掉轉頭假如五六月個市都唔散，歐美掉出一大堆英文字母，如QE、LTRO咁，唔排除個市隨時挾到年底，等美國總統選埋都唔出奇。在賭升賭跌均可，但一般人又無法掌握下，基金同散戶惟有等一切塵埃落定至算，牛皮悶局隨時要持續多一兩個月。

年資比較長的股民，應該仲記得比亞迪（01211）十年前為發展電池汽車，收購一間叫秦川汽車，當時被諷為飲奶而買牛。最近，又有一單令人摸不着頭腦的收購。中國鋁業（02600）先係向煤炭生產商南戈壁（01878）提出收購，及後被蒙古政府叫停，至今未有定案，但無阻中鋁對上游資源的渴望，今次揀上被插滿穆迪紅旗的民企股永暉焦煤（01733），收購29.9%股權，出價相當於每股2.12元，交易涉及23.9億元，比南戈壁收購價72億元低。

中鋁血拚銀行找數

假如在行業高峰期，中鋁閒錢多，為穩定煤炭供應，收購實在無可厚非。可是，面對經濟放緩，氧化鋁價格不濟，中鋁備受市場供過於求的壓力，去年業績只賺2.37億元（人民幣．下同），數字僅及○六、○七年高峰期過百億的「零頭」。隨着工業製造放緩，煤炭價格開始見頂回落，實在看不到中鋁何以咁急於要提出收購。看來，截至去年底總負債高達989億元的中鋁，並唔擔心會有還唔到錢的一日。

儘管筆者對中鋁業績同還債能力同樣懷疑，不過今次事件道出一個事實，就是內地金融機構對民企與國企是有分別的，後者無論經營多差，財政情況多惡劣，國有銀行都會二話不說，慷慨地為阿爺的企業提供貸款。去年中鋁單是還息便支付了34.3億元，差不多是盈利的十三倍，如此經營狀況，怎能令投資者相信買下上游資產，就能省下一筆經營成本？倒過來，也說明了投資者何以會在內銀股估值上，加上極大的折讓。