股海實戰：上實城開限注跟炒

隔晚外圍股市低收，惟港股前日經已預先跌定，所以尋日上晝恒指只係輕微低開，之後基本上睇住A股變化走，結果滬綜指微升收場，恒指回升52點，收報20,677點，成交回升至498億元。

內地盛傳住建部正醞釀一系列刺激剛性需求入市嘅措施，以防地產投資增速跌勢過急，要出手穩定市場。若然消息屬實，顯示內房產業最壞時刻尚未出現，但從好嘅方面諗，官方喺調控內房產業嘅同時，有意識主動穩定市場，有保有壓，至少唔使太過擔心樓市去泡沫化最終會波及銀行業。

成交低迷經紀閉翳

港交所（00388）選出新任主席，由於新主席過去對金融特別係證券業嘅直接參與唔太多，係咪稱職就要放長雙眼。最近同一班卜架吹水，大家都在慨嘆港股成交低迷，以單日成交額四百零億為例，七除八扣，實際上透過經紀落盤買賣嘅都唔知有冇一百億，仲未計依家中小型經紀行競爭激烈，好多都唔係收正佣，長此落去行業發展暗淡，且看交易所新舵手有咩板斧，好幫助業界度過逆境。

現年六十二歲嘅上實城開（00563）主席兼執董蔡育天因到達退休年齡而要退休，由現任總裁兼執董倪建達接任。還記得當年上實（00363）董事長蔡來興退休都做到六十六歲，現時上實董事長騰一龍亦經已六十四歲。近年主導上實集團地產業務重組嘅蔡育天，功未成卻身先退，確實令人有點意外，亦令上實城開作為集團地產業務旗艦角色添變數。

之不過，上實城開股價未有因此而受壓，尋日升4.6%至1.59元收市，成交增至1,957萬元，搞邊科唔知道，只係見到幅圖呈圓底回升幾省鏡。畢竟上實揸住上實城開七成股權，即使內房行業吹淡風，亦唔使驚好似民企咁突然消失。只係日後公司發展路向如何，未必三兩個月就有答案，睇實成交跟炒亦要限住注碼。作為參考，向上睇上月高位1.69元及250日線1.78元，10日線支持及月初低位分別喺1.52元及1.4元。

Tip股我至Top

藺俠（4/16）Tip恒指法興牛（61339）最多升24%

史提芬（4/19）Tip新華保險（01336）最多升8%