樓市出更:銅鑼灣舊樓29年賺百倍
近年銅鑼灣零售市道興旺,大型零售品牌紛搶佔區內一線舖位落腳。鄰近時代廣場嘅霎東街同堅拿道東一帶,近幾個月連環錄到多宗大額成交,好似霎東街47號全幢啱啱以1.35億元賣出,約莫二十九年身價急升111倍。
劉Sir尋日到過上址,就現場所見,霎東街47號係一幢樓高約四至五層嘅舊樓,同霎東街49號相連接,兩者共用同一條樓梯。47號地舖依家係一間時裝店,店員蔡小姐話,間舖原本喺同區禮頓中心地下,已開業達十年,但由於個商場之前翻新,所以搬去霎東街現址繼續經營,現址都做咗約一年半。
兩幢共用樓梯或收購
蔡小姐話平日除咗遊客,都有唔少街坊熟客,如果因為幢樓賣咗要再搬遷都無辦法。
據土地註冊處資料,上址樓齡近五十年,上月以1.35億元成交,登記買家公司叫金興國際(香港)有限公司,原業主喺八三年僅以120.5萬元買入,持貨約二十九年沽出,升幅高達111倍。劉Sir估計,由於47號同49號係共用一條樓梯,若果今次47號係被財團收購,咁唔知49號之後會唔會都被財團睇中。
堅拿道東地舖連環沽
銅鑼灣一線街零售業極為暢旺,帶動時代廣場周邊街道都成為唔少投資者嘅搶吸對象,之前堅拿道東24號同25號地舖,喺短短幾日內連環沽出,成交價分別為1.11億元及7,800萬元。而現時由「何洪記」粥麵租用嘅霎東街2號地下連閣樓舖位,亦趁機以約2億元喺市場放售,業主更打算租約期滿後,大幅加租逾1.3倍至每月約30萬元。
據世邦魏理仕最新出版嘅《零售業全球化進程》報告顯示,本港喺奢侈品牌嘅排行榜上,連續三年蟬聯世界第一,有達86%受訪嘅高檔零售商有意進駐;與此同時,喺所有國際品牌零售類別中,亦高踞亞洲第一位。至於銅鑼灣區嘅租金升幅最大,主要由化妝品同鐘錶商戶擴充所帶動,首季平均呎租653元,按季升約2.7%。
銅鑼灣霎東街47號為一幢樓高約四至五層舊樓。