Fundman睇市：安踏體育隨時挾淡倉

人行話支援製造業、服務業及中小企業，將適時降低存款準備金率，街外估今年至少有2至3次，各50點子的下調空間，放水預期推波助瀾，港股昨升214點，報20,995點，期指行先一步，重返兩萬一關口樓上，可惜成交唔算配合，得471億元，似挾倉多過基金大舉入市。

內地傳媒報道，杭州金星之後，順德市一間小型房企廣德業公司申請破產，內地嚴厲壓抑樓市炒風下，料更多中小型房企倒下，資本密集的房企生意，將逐漸演變成寡頭壟斷的情況。

賭仔們常言道，賭錢最緊要搵「燈」，意思係搵一個黑仔過自己嘅，同佢對着幹自然贏多輸少。近排筆者對大市睇法一直淡淡哋，直到近幾日大市由兩萬點升番去接近兩萬一點，雖然話多間大行，紛紛賭人行短期會放水，再減存備金率，但作為半個賭徒，不得不說，筆者認為近期幾乎逢賭必輸的「沽神」普爾遜，原來靜雞雞去賭歐豬問題爆煲，「燈」味極濃。

沽神明燈有啟示

話說「沽神」同客戶透露，近日正押注德債淡倉，同時買入相關CDS，「打孖」賭歐豬債務危機最後會火燒連環船，拖累德國債息飆升。「沽神」在美國次按風暴中一沽成名，但過去年半確係黑過墨斗。去年初買美國銀行股票，到下半年歐債危機輸鑊甘止蝕，沽清後，去年十月銀行股大反彈，變咗戥人高興。賭中國概念的嘉漢林業，兩個月輸掉5億美元，破晒基金創立以來單一投資損失紀錄，拖累旗下基金由高位計損手51%，意味要追返去water mark的分紅水平，至少要贏番104%。睇情況，如果「沽神」唔盡快賭鋪勁去收復失地，大客流走難免。

弔詭嘅係，極少對沖基金會喺建立倉底期間「爆響口」，到底「沽神」係對自己無信心，希望借助市場力量齊齊唱衰歐元區危機？抑或純粹大大聲細細注試試水溫先決定加注？不得而知，但寧可信其有，沽神光過大光燈係不爭事實，傍晚西班牙拍賣兩年及十年債反應尚可，至少賣出債券金額達到預期範圍，看來債商無「沽神」咁悲觀，要急於翻身，「沽神」睇嚟要搵其他idea至得。

同個賓架傾開，醜股之中佢睇好體育用品股，皆因市場九成九人睇死今年幾個龍頭，務必積極出清過時存貨，毛利率想好睇都難，一二、一三年業績甚至可能倒退，不過股價也反映得八八九九。國壽（02628）昨日升勢畀到筆者啟示，短期盤數麻麻唔緊要，芬佬一窩蜂博反彈，第一要搵夠平，第二係要行業龍頭，貪佢夠大隻，上落車容易，始終想同佢做人世嘅仲係少數，博幾日死貓彈，估值去到單位數水平，要再跌風險相對較細。

體育用品股最大隻係安踏（02020），市值194億元，市盈率得9.1倍，未來幾日會出今年第四季定單指引，如果唔係想像中咁差，隨時出現挾淡倉情況，早前股價在7.6元搵到支持，要博上番8.5甚至9元，應該唔難。