樓市出更：代理擴軍教人獨立搵食

二手樓市交投持續暢旺，加上準入市買家對物業代理服務需求亦「升呢」，劉Sir收到風，一向以「特許經營」形式經營嘅世紀21，為配合市場要求，同埋增兵需要，率先決定斥資逾100萬元擴展「獨立代理」營運模式。有別於傳統代理經營模式，新計劃「以人為本」，提供較全面嘅物業代銷服務，預計獨立代理人數會倍增至大約500人。

世紀21行政總裁吳啟民同劉Sir傾開，其實該行已推行獨立代理制度約十幾年，見到呢排個市好番，買樓除咗係「住」基本需要外，更成為投資增值財富嘅工具，買賣雙方對地產代理要求大大提升，要求更人性化，同更貼身嘅服務，所以決定投資逾100萬元，擴展獨立代理計劃，希望由依家約200名獨立代理，倍增至大約500人。

不限地區 慳番開舖

佢仲話，「獨立代理」同傳統用分行零售形式嘅地產代理唔同，地產代理只係代銷物業中介人，獨立代理着重人才培訓，佢哋同客戶嘅關係、溝通，真切了解客戶需求，先至係計劃最重要部分。集團唔使舖租，慳番唔少營運成本。

佢同劉Sir講，除咗向「獨立代理」提供基本放盤之外，該行更提供培訓，由銷售、管理、態度，到拓展市場技巧，都由八名來自唔同物業範疇嘅資深獨立代理教授，所以就算冇牌都可以加入。

「其實傳統地產代理，通常都只可以做住宅或者工商其中一瓣，仲要分區、分行，但做咗獨立代理，個代理做邊類物業都得，又唔使限定喺邊區做生意，慳埋開會、行政工作嘅時間，工作的靈活同彈性更大。」吳氏仲話，世紀21會為獨立代理提供晉升機會，等佢哋個個都可成為獨當一面嘅代理。

佢相信，香港地資金充裕，未來工商物業樓價會再升約10%，而核心區舖位買少見少，所以位於二、三線地區舖位升幅會更犀利；而住宅方面，估計樓價再會升5%，其中新樓最受追捧。