Fundman睇市：解禁股出籠A股難安寢

中國首季GDP增長8.1%，市場對昨日公布的外商直接投資（FDI）有晒心理準備麻麻哋，結果再跌6.1%至117億美元，乃連續五個月按年下跌，憧憬人行四、五月繼續水浸股市的威力，被經濟過快減速的憂慮蓋過，滬綜指再跌近1%，收報2,334點，指數一日唔升穿二月底高位2,478點，過去每次反彈浪頂一次低過一次的形態未變。

上個月滬深兩市合共有5.75億股大小非解禁，減持規模更達10.73億股，創廿七個月新高，按年與按月分別增加60%及3.9倍，如果信上市公司股東比街外散戶睇得更清楚更遠，情況確係令人有啲不安。

浪低於浪格局未改

尋日港股大部分時間陰陰乾，市場注視歐豬拍債及周末法國總統選舉，不明朗因素充斥下，大孖沙靠邊站。直到三點後歐股開高，好友慢慢收復失地，恒指由最多跌218點，到收市只跌48點，報20,562點，可惜主板成交少得可憐，只得485億元。走勢上，恒指尋日低位20,392點，差32點就完全補番上星期五20,360點留低的上升裂口，大市也重返10日線20,516點樓上收市，但較穩陣仲係等指數升穿上周高位20,816點，扭轉一浪低於一浪格局先有得傾。

收市後西班牙拍賣12及18個月債券，息率分別由三月對上一次拍債的1.418及1.711厘，升到2.623厘及3.11厘，借錢成本高咗，不過超額認購倍數亦都比上次高，去到2.9及3.77倍，半杯水故事，話反應好又得，話成績唔好都得。查實歐洲債商，經長期再融資操作（LTRO）借來三年平錢，泊落去12及18個月的西債，根本係free rider，因此聽日的三年及十年債拍賣，債商對西班牙財政有幾大信心，先係考驗，看官們要密切留意。

統一具備復甦概念

中央訂4%通脹目標，但大部分分析師都預測，樓價回落加上經濟放緩，全年通脹可能只有3至3.5%，部分得益於通脹紓緩的公司，像受惠紙漿價格回落的兩間紙巾及紙尿片製造商恒安（01044）及維達（03331），今年表現就鶴立雞群，副食品生產商統一企業（00220）及旺旺（00151）等，也有類似情況。由於產品屬民生所需，預期受經濟放緩的影響不及奢侈品，加上原材料及包裝用塑膠價格回落，對於過去兩年飽受成本壓力的副食品股，業績可輕易有可觀的增長。

統一去年業績令人失望，賺3.12億元（人民幣．下同），按年倒退四成，同○九年度賺7.04億比較，得番一半都無。睇番兩年來，受原材料價格上漲拖累，統一毛利率由39.7%跌至29.2%，純利率更由7.73%大幅收窄到1.83%，儘管銷售額幾乎翻一番，由91億躍升至169億，可惜利錢太微薄，即使去年方便麵及茶飲品好賣，對業績而言也於事無補。

隨着擴產進入高峰期，25至30%的營業額升幅，加上毛利率回歸到較合理水平，大行預測統一今、明兩年分別賺6.27及8.38億元，相當於100%及33%增長，其實唔算太進取，只係一三年預期市盈率19.8倍，或者復甦概念部分已率先透支，而資本需求高峰，高盛估統一淨負債比率明年會升至74%，集資風險增加，捧場客或者可留有一手，等落實批股時再買多一注，平衡一下風險。